65th National School Games Boxing U-17 Aizawlah tan

Nimin chawhnu khan ni 4 awh tur 65th National School Games Boxing U-17 chu R.Dengṭhuama Multipurpose Hall, Mualpui, Aizawl-ah School Education Minister Lalchhandama Ralte chuan a hawng a, Human Resources Development Board Vice-Chairman L.Thangmawia pawh-in he hun hi a hmanpui a ni.

Hawnna thu a sawiah Lalchhandama Ralte chuan National School Games Boxing-a tel zawng zawngte chu chakna, theihna leh thiamna an neih hmanga hnehna chang tura theihtawp chhuah turin duhsakna a hlan a. Mizorama an cham chhungin remna leh muanna hnuaiah hlim taka awm turin duhsakna a hlan a ni. Minister chuan National School Games neih chhan chu zirlaite taksa leh rilru tihhmasawn a pawimawhzia a taka lantir hi a ni a ti a. He intihsiakna hian zirna in ten zirlaite ṭhanlenna atana infiamna kan dah pawimawhzia a tarlang a ni a ti a. He games-ah hian infiammi tha ber berte che vel kan hmuh ngei ka beisei a ti a. Infiammite chu anmahnia a tha ber chhuah a, infiammite tih a mawi a che tur leh dik taka infiamna kalpui turin duhsakna a hlan a ni.

November 19-22, 2019 chhunga neih tur 65th National School Games 2019, Boxing under-17 (boys) hawnna inkhawm hi Esther Lal Ruatkimi, Commissioner & Secretary, School Education Department-in kaihruaiin India ram hmun hrang hrang aṭanga infiammi leh official lo kalkhawmte lawmna thu sawi a, inelnaa tel zawng zawng hnenah ngaihhruina thilpek hlan an ni bawk.

65th National School Games, 2019 Boxing under-17 (boys) ah hian India ram state hrang hrang leh unit 36 aṭangin boxer 413 leh officials 73, an vaiin mi 486 an tel a. Weight category 13 ah inelna neih a ni ang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram