Tlabunga Tlawmngai pawlte chuan hmasawnnain an khua a kal kan nasat em avangin Mizo pem chhuak an tam an ti.
Nimin khan Tlabung Joint NGO Co-ordination Comtt leh MSU Regional Hqrs. Lunglei te MSU office-ah inkawmin Tlabunga Mizote harsatna chungchang an sawi hova, Tlabung NGO hruaitute chuan Tlabung leh a chhehvela Mizote an pun leh theihna ber tur chu hmasawnna thlentir tura District Headquarters pek a ni, an ti a. Tui a len changa khua an chhuahsan ngai loh nachhan chu Mizote tan ram an humhalh vang a ni tih sawiin sawrkar aṭanga hmasawnna a tlem em avangin a ni telin Mizo an tlêm a, hetihlai hian Chakma erawh a ni telin an pung a ni, an ti a. Tlabung Hospital-ah thla khatah naupiang 15 aṭanga 20 an nih laiin Mizo nau piang thar erawh 3 aṭanga 5 vel lek an ni, an ti a. Tlabung chhehvela Mizo awmna Sikul building thawm ṭhat loh a tam em em laiin Chakma khuaah erawh sikul sak ṭhat a tam em em a ni, an ti a. Kawlphetha an nei ṭha lo lutukte chuan nun a tihrehawm em em a, Mizoram sawrkarin a hnathawkte hremna atana Tlabunga a dah ṭhinte chuan an rilru a tina hle tih an sawi bawk.