Lawrkhawm (21.11.2019)

MJA Gen. Hqrs. hruaitute lo kal dawn
@ MJA Gen. Hqrs. hruaituten District hrang hrang tlawh chhuah an tumna kal zelah vawiin hian an president Zonunsanga Khiangte hovin Serchhip District an rawn tlawh dawn a, vawiinah hian Serchhip District MJA member-te nen Hortigulture Department Centre of Excellence, Lengte rama mi an tlawh ang a, tlai lamah MJA, Serchhip District member-te nen inkawmhona an nei ang a, naktukah hian Fisheries Department hmalakna an tlawhho leh dawn a. MJA member-te hi naktuk zingah District Bawrhsap Sangchhin Chinzah chuan a bangla-ah tukṭhuan a buatsaihsak ang.

Inkâwm
@ Nimin chawhma khan Lt Gen Anil Chauhan, GOC-in-C, Eastern Command chuan Raj Bhavan-ah Governor PS Sreedharan Pillai a kawm. Governor PS Sreedharan Pillai a kawmnaah hian Lt Gen Anil Chauhan chuan hna pawimawh thawk tura rawn zin a nih thu a sawi a. Ram vehimna kaihhnawih thil pawimawh te an sawi dun a. Hemi hnu hian Mizoram leh Mizoram ramri hrula Defence kaihhnawih thil pawimawh thenkhat te pawh an sawi dun bawk a ni.GOC-in-C hi Maj.Gen G.A.V. Reddy, IG, Assam Riffles, Brig S.Vinod, Sector Commander leh Brig AS Gahlot, Deputy M.S. ten an rawn tawiawm a ni.

MRB Regional Office hawng
@ Nimin chawhma dar 11 khan Mizoram District paruk huam tura ruahman Mizoram Rural Bank (MRB) Regional Office, Lunglei chu K.Lalrinzuali, Lunglei Deputy Commissioner in a hawng. Hawnna inkhawmah hian MRB Chairman V.Jaya Chandra leh MRB hnathawk-te, sawrkar official-te, MJA Lunglei hruaitute leh sawm bik mi ṭhahnem tak an kalkhawm a ni. Mizoram Rural Bank hian Branch 85 neiin, Head Office 1, Regional Office 2, Aizawl leh Lunglei a nei mek a. Thawktu mi 432 an awm a ni.