Serchhip District chhunga lui dunga sangha leh nungcha humhalh ṭha YMA Branch panga (5)-te hnenah nimin khan lawmman (incentive Awards) pek an ni a, K.Lalrinliana, Fisheries etc Minister chu khuallian niin lawmman te hi a hlân a ni.
Serchhip Auditorium-a he hun hmannaah hian lui dung sangha leh nungcha humhalh ṭha lawmman hi Bungtlang Vengsang Branch YMA, Bungtlang Chhim Veng Branch YMA, Hmunzawl Branch YMA, Ngentiang Branch YMA leh Chhingchhip Venghlun Branch YMA-te hnenah hlan a ni a.
Lawmman a hlan zawhah Minister chuan thusawiin, Serchhip district chhunga YMA branch 30 zetin anmahni ban phak chin lui-te nasa taka humhalh nachang an hria chu thil ropui tak a ni tih a sawi a, minister chuan lui dung humhalhtuten anmahni ṭanpuitu tur dan fumfe an nei tawk lo nia an inhriat ṭhin chu sawrkar chuan hriatpuiin, tun Assembly session hnuhnung berah khan dân fel fai tak pass a nih thu leh hei hian lui humhalhtute a ṭanpuia a tihchak an beisei thu a sawi a.
Minister chuan kan rama lui te uluk taka kan humhalha, mumal taka kan enkawl theih chuan, sangha dil lama kan tharchhuah te nen, kan sangha mamawh za zela 80 vel chu kan thar theih beisei a nih thu a sawi a, minister chuan Mizoramin a mamawh, buh, sa leh thei lamte chu SEDP aṭangin ûmzui an ni dawn a, peng hrang hrangah chak taka hna kan thawh theih nan Board 14 din a nih thu sawiin, hmalak an tum dan tlangpuite a sawi bawk.
He huna Khualzahawm Thlamuana, Secretary, Fisheries Deptt. pawhin thusawiin, Mizoram chuan tun Assembly Session hnuhnung berah khan Fisheries Rules mumal tak a nei ta a, kum 2002 velah Act kan nei ṭan a, Rules a nei mai lo deuh a, ennawn ngai leh siamṭhat ngaite a lo awm hlek hlek bawk a, tunah chuan lui dung humhalhtuten kan nghahhlelh em em ṭhin dan kan nei ta a, nasa zawkin kan lui nungchate kan humhalh thei dawn a ni, a ti a. Lui dung humhalh hnathawktute hah lutuk tur lo chhawmdawl ve-na tur The Mizoram Fisheries Conservation Reward Scheme, 2019 pawh neih thar a nih thu sawiin, YMA-te inpekna leh an thawhrimnaah lawmthu a sawi a, Sangha dil neitute tana sawrkar ruahmanna ṭhenkhat a tarlang bawk.
Khuallian ṭawiawmtu, C Lalramzauva, Adviser to Chief Minister leh C.Lalmuanpuia, MLA, Vice Chairman, Veterinary, Fishery & Sericulture Development Board-te bakah R.Sanghmingthanga, President, Sub Hqrs YMA, Serchhip leh lawmman dawngtute aiawhin PC Vanneia, Chhingchhin-te pawhin thu an sawi bawk.
Zonuntluangi, DFDO, Serchhip chuan Serchhip District chhunga lui dung humhalh chanchin tlangpui report pein, kum 1992 ah N.Mualchengin an khaw ram lui Varhva chu an lo humhalh ṭan tawh a, tun thlengin khauh taka humhalh-in Varhva chu lui hmingthang takah an chhuah a, an meichher lo chhit tawh kal zelah tunah hian district chhunga Branch YMA 30 ten khauh takin an huamchhungah lui an humhalh hlawm a ni, a ti a. Lui humhalh ṭhate hnenah lawmman hi lo sem tawh ṭhin a nih thu sawiin, Branch 7 hnenah lawmman pek an lo ni tawh a, tun ṭumah hian Branch 5 hnenah hlan niin heng an lui humhalh te hi mithiam zawkte nena zirchianna te neiin Sangha chi tharte pawh hmuhchhuah an nih hial thu a sawi a ni.
He hun hi F.Vanlallawma, Director, Fisheries Deptt. chuan a kaihruai a, lui humhalh ṭhate hnena an lawmman sem chu Social Welfare Department kaltlanga Article 275 (1) fund an dawn hmanga an sem a nih thu-sawiin lawmman dawngtute hi Rs.30,000/-, Citation leh Momen-to an hlan thu a tarlang a ni.
He hunah hian Sangchhin Chinzah, DC Serchhip leh sawrkar official-te MJA, YMA hruaitute, zirlai naupangte, lawmman dawngtu Branch hrang hrang aiawh YMA member engemawzat leh sawm bik mi pawimawhte an tel a ni.