Officer 39-te tan IT hmanrua leisak tawh

Mizoram sawrkarin a hnuaia thawk Under Secretary chung lam mi 39 tan Rs.20,55,795 sengin IT hmanrua a leisak tawh tih Chief Minister, Zoramthanga’n House a hrilh.

Nimina Assembly Session-ah zawhna chhangin Chief Minister chuan sawrkar laipuiin Digital India leh e-governance a kalpui chhoh mekah state sawrkar te a nawr nasa a, sawrkar hna lak thar tura thiamna ngai zingah Group-D leh engemaw ngaih-hnathiam tlemte tih lohah chuan Computer thiamna lamah Diploma tal neih a ngai, tih a nih tawh hial avangin state sawrkar pawh a ṭang nasa, a ti a. Sawrkarin Laptop, Tablet leh thil dang lei phalna a pekte hi Officer zawng zawng ni lovin a mamawh zual-puite chauh leh IT lama thiamna nei, a hmang thiam leh hlawkpui tur te an ni, a ti a. Sawrkarin IT hmanrua a leisak hi Officer mimal ta ni lovin sawrkar ta a ni a, a chhiat leh a bo thu-ah a kawltute’n mawh an phur a, kum 5 a liam hma chuan a dang lei leh theih pawh a ni lova, a kawltu Officer-te hmun danga sawn an nih chuan an aiawha rawn awmte’n an chhawm zel tur a ni, a ti.