Vawk talh tur 762 lalût

AH & Vety Minister Dr. K. Beichhua chuan sawrkar phalnain tun hnaiah state dang atangin Vawk hrisel ṭha talh tur 762 lak luh a nih thu House a hrilh.

Assembly Session-a Lalduhoma’n ‘Calling Attention’ a hmannaa vawksaa har-satna tawh mek chungchang a sawi a chhannaah Minister Dr. K. Beichhua chuan hunpui Krismas lo thleng turah mipuiin Vawksaa harsatna an tawh loh nan sawrkar chuan hma lain, PRRS leh African Swine Fever natna laka him Vawk lak luh a nih theih nan Commerce & Industries Director hnenah phalna a dil theih, a ti a. AH & Vety Director hriatpuinain Vawk lakluh phalna hi dil theih a ni a. Tun thlengin mi 17-in Vawk lakluh hi an dil tawh a; Vawk 3845 lâk luh phalsak an ni tawh a, Vawk 762 chu lak luh a ni tawh a, kum thar January thla thleng Vawk lak luh hi dil theih a ni, a ti.

Hetihlai hian PRRS leh African Swine Fever vanga Mizoram vawk te an pulh vek loh nan Myanmar, Bangladesh leh ram dang aṭanga vawk lak luh khapna erawh chu khauh taka kalpui chhunzawm zel a ni ang, Minister chuan a ti.

Lalduhoma hian Calling Attention a hmannaah hian PRRS natna vanga Vawk lakluh khapna chuan vawksa zuar te, Hotel leh Restaurant neitute mai bakah mipuiah harsatna a thlen mek avangin vawk lakluh hi phal ni tawh se, a lakluhna tur hmunah hri laka an him leh him loh uluk taka endik erawh ni se, tiin rawtna a siam a ni.