Nakum 2020-a ‘Paragliding Accuracy Landing World Cup’ Serchhip-in a thlen tur atan Mizoram Areo-Sport Association (MASA) Serchhip Sub Hqrs-ten inbuatsaihna an kalpui chho mek
Ningani tlai khan Serchhip Hmar Veng YMA Hall-ah MASA Sub-Hqrs. Executive Meeting chu an president C.Lalhminghlua kaihhruaia neih niin, karleh Thawhlehni khian Glider-te thlawh chhuahna tur hmun, Bawngchawm Tlang panna kawng ba thenfai leh hmun-hma remchang laia ṭhutna siamin hnatlan nise an ti a, Paragliding World Cup lo awm tur atan Serchhip Sub-Hqrs. Level-ah Organising Committee hranpa din ve kher lovin MASA Sub-Hqr. Serchhip chuan khai mai se an ti a, chutih rual chuan he World Cup thlen turah hian sawrkar lamin State Level Organising Committee din tawh tho mahse Sub Hqrs Level-ah erawh Sub-Committee hrang hrang din nise, heng Sub Committee hrang hranga hruaitu turte rawtna chu tun thla ni 20 ral hma hian MASA Sub Hqrs Serchhip Secretary hnenah thehluh nise tih a ni bawk.
MASA Sub-Hqrs. chuan Serchhipin nakuma Paragliding World cup an thlen tur atan mai nilovin, ṭhalaiten Paragliding leh Adventure Sports danga an lo tui chhioh zel theih nante, Serchhipin Adventure Sports atana International Standard tlingpha hmunhma/ro (asset) kan neih theihna hun remchang a nih dawn avangin a ṭha thei ang ber turin Bawngchawm Chuanhnuai chu cheihnumin, a panna kawng (Approach road) te bakah a van hawng zau zawk leh him zawkna atan electric hrui hnawk awmte senghawi hna an thawk bawk a, tunah hian he tlang atang hian a rual mi 5 thlawhchhuah theihna tura siam fel tawh ani a, a ṭumna hmun nghet tur atana Serchhip Zawlpui Phaia minal ramte pawh dawr mek zel niin, Bawngchawm tlangah infiam mite halhchawlhna tur in sa tura hmalak mek a ni a, nakum K|P Gen Conference Serchhipin a dawn turah pawh Inkhawmpui palai a duh apiangte tan paragliding a inphurhna (Joy Ride) lo buatsaihsak an tum bawk a ni.
MASA Serchhip Sub Hqrs-ah hian executive member 33 leh adviser 4 awm a ni.