SHC Inthlanah Lawmthu sawi nan Congress leh a thawhpuite candidate an thlan tlin ngei ka beisei:Hawla

MPCC President Lal Thanhawla chuan Sinlung Hills Council inthlan turah, mipuite chuan remna siamtu Congress Party laka lawmthu sawi nan Congress leh a thawhpuite candidate an thlan tlin ngei a beisei thu a sawi.

Nimin khan Lal Thanhawla chuan Congress Bhavan-a Polictical Session an neihah sawiin, Congress Party chu a thochhuak leh mek tih a sawi a. Maharashtra leh Haryana state legislative inthlanah pawh Congress party-in nasa takin hma a sawn a, BJP an talbuai phah hle a ni, a ti a. Indian economy pawh nasa takin a tlahniam mek a, mithiam tam tak an mangang a, PM hlui Man-mohan Singh ruai turin BJP sawrkar hnenah thurawn an pe hial a ni tih a sawi. “Jammu & Kashmir laka thuneihna an lek dânte, Parliament pawh râwn lo a Article 370 an paih duh dante en hian Mizote leh hnam tenau dangte hi dinhmun hlauhawm takah kan ding mek a ni” a ti bawk

MPCC Vice President H.Liansailova pawhin thu-sawiin, Mizoram-a Drugs hluar ta lutukte, zu khap a ni chunga a tam lutuk rengte, sum leh pai harsatna a tawh mekte, HIV pung chak lutukte chu Kohhrante nen ṭangruala siamṭhat a ngaih thu a sawi a. Congress party chu Mizorama remna meichher chhitu, remna atana lalṭhutthleng kiantu a nih bakah Mizorama hmasawnna liantham leh ngelnghetho zawng zawng Congress kutchhuak deuh vek a ni, a ti a. Finance management chung-changahte, hnam inpumkhatna chungchangah Congress party chu a thawh hlâwk hle tih sawiin, hetiang avang hian party tam tak an zuihral tawh laiin Congress party chu Pathian zarah nghet takin a la ding reng a ni a ti.