Mizoram Police chuan thuchhuah siamin, tunlai hian Bank Account hmanga inbum-na a tam hle tih an sawi a, fimkhur turin mipuite an chah.
Police thuchhuah chuan Bank Customer-ten link, phone call, SMS emaw, WhatsApp Message hmangin Bank Account-a pianni dik lo siam ṭha turin leh Bank Account update tura tihna/hriattirna an dawng ṭhin tih an tarlang a, Bank Account hmanga mi bum chingte hian Customer-te ATM number, PIN leh OTP te an zawt bawk thin. Hetianga Bank Account update tura tihna pop-up/call/SMS/whatsapp message/link hi Bank Account hmanga mi bum chingte tih a ni ṭhin a, Bank Customer-te thawhchhuahsa sum ruksakna hmanrua a ni fo ṭhin, an ti.
Mizoram Police chuan mimal bank account chungchang zawhna, link, pop-up, email, SMS leh phone call te chhang lo turin leh mobile number, password, ATM number-te phone, email leh SMS hmanga mi bum chingte hrilh loh turin a ngen a. Bank-te hian hetiang information hi phone call leh sms hmangin an zawt ngai lo a ni. Mimal chungchang (personal information) leh bank account chungchang te pop-up, link, email, sms leh call hmangtea hrilh lo tur leh mi bum hmangte laka fimkhur turin mi zawng zawngte an ngenin an hriattir tih an tarlang.