Nimin tlai dar 2:30 khan YMA Sub-Hqrs. Serchhip hnuaia Kumpuan Committee chuan YMA Sub-Hqrs. Office-ah Serchhipa thuthar lakhawmtute kawmin an hmalakna te an hrilh.
He hun kaihruaitu Lalzui-liana, Chairman, Kumpuan Committee chuan kumin YMA General Conference-in kumpuan atan ‘Zirna Uar’ tih chu pawm ni tawh mahse Central YMA-in a hawnna hun an la hman loh avangin Sub-Hqrs. YMA pawh-in kumpuan kal lai, Ram leh hnam humhalh kawngah an la insawr bing tih a sawi a, Kumpuan Committee secretary Lalram-muana chuan press conference koh chhan tlangpui sawiin, Kumpuan Committee chuan kan rama hnamdang sumdawng awm lohna turte, ILP dik taka hman a nih theihna tur leh hnamdang nupui pasal neilo tura inzirtirna kawngahte hma an lak ṭhin thu a sawi.
Thuthar lakhawmtute hnenah hian R.Sanghming-thanga, President, Sub-Hqrs. YMA, Serchhip chuan YMA-in kum 13 zet kumpuan atana a hman tawh ‘Ram leh hnam humhalh’ kawnga hmalakna chu a hautak ṭhin hle tih a sawi a, kan chhehvel hnam dang tam tak chu sumdawnna hmanga chimral an nih tawh avangin hemi tawng lo tur hian Mizote kan fimkhur a, ṭan kan lak a ṭul tih sawiin, Mizoram chhim lam chu sumdawnna kawngah hnamdang sumdawng lianten an chimral mek nia a lan thu a sawi a, Serchhip chu ram laili a nih avangin midangte entawn tura theihtawp chhuah a ṭul tih sawiin, YMA chuan Serchhipa sumdawnna lian tak tak kalpui tum hnamdang engemawzat chu dân tlawhchhan nei chungin harsa taka an lo ûm chhuah tawh ṭhin thu a sawi a, hei bakah hian Serchhipa Mosolman biak in sakna tura ram hralh tawh pawh Sub-Hqrs. YMA hmalakna avangin ram leitute leh ram neitute an inthleng lêt leh tih a sawi a.
Hnamdangte Mizorama an sumdawn theihna dân chu tihtawp vek a nih tawh avangin hnamdangten Mizoramah sumdawn theihna dan an nei tawh lo tih a sawi a, hei bakah hian hnamdangten Mizoramah ram neih theihna dan an nei lo tih a sawi bawk.
Hnamdang ṭhenkhatten Mizo nupui an neihte hmanga Mizorama sumdawn an tum a nih pawhin dân kalh a ni tih a sawi a, dânin a sawi angin Mizo hmeichhia hnamdang (non-tribal) pasal neite chu hnamdang (non-tribal) pasal atana an neih khan anmahni pawh non-tribal an ni ve nghal tih a sawi a, anmahni mai bakah an fate pawhin tribal-te ham-ṭhatna reng reng an dawng thei tawh lo tih a sawi bawk.
YMA Sub-Hqrs. president chuan Serchhip behchhana a chhehvel khuaa bungraw sem kuala sumdawngte titawp tur pawhin thuneitute nen hma an laho ṭhin tih a sawi a, Mizo-te ngeiin diklo taka hnamdang kan sponsor hrehlo ṭhin chu kan hnam tan a himlo tih sawiin, hetiang tih chingte chuan sim tawh se a duh thu a sawi a, tuna cement work-a Mizoten harsatna kan tawh mek, ṭheka lova hnamdang cement mistiri chhawr tur vâng ta lutuk pawh chu mahni chhawr tur chauh hnamdang sponsor nise, kan chhawr zawhah thawn haw leh zel ni ṭhinin, hnamdang sponsorship dik taka kalpui nise chuan ‘ṭhekha system’ vanga harsatna kan tawh hi a tawp thei dawn tih a sawi bawk.
R.Sanghmingthanga chuan Mizote chu sumdawn-na kawngah kan ṭhanharh a ṭul tih a sawi a, Mizo aia hnamdang-in an tihtlawm vanga hnamdang thil kan lei hian kan dawrna pawisa chu ram dangah a liam vang vang a, Mizote kan dawr a nih chuan Pathian ramahte, inneih lawmpuinaah te, mitthi ralnaahte, kan Mizopui-te thar ngei thlai leina atante hman chhuah leh ṭhin a ni a, Mizote tan chuan mahni Mizopuite ngei dawr hi a hlâwk tih a sawi.
Zawhna chhangin YMA hruaitute chuan Serchhip leh a chhehvela hnamdang (Mani-puri)-te pawh ILP-in a huam ve vek thu a sawi a, Myanmar (Forei-gner) te pawh enzui deuh ṭul nia an hriat thu an sawi bawk.