Tripura Bru camp hrang hrang 6-a Mizoram khua leh tui te Mizorama hruai kir thawh 9-na kal mekah hun engemaw ti chhung Mizorama kir duh an awm tawh loh hnuah nimin khan Mamit district-a awm tur chhungkaw 11 hruai kir an ni.
Mamit District Bawrhsap Dr Lalrozama sawi dan chuan nimin hruai kirte hi Naisingpara camp aṭangin chhungkaw 6 leh Naisingpara camp-a awm anmahni thu-a Kanhmun Facilitation Centre Liaison Officer hnena inlan chhungkaw 5 te an ni a, nimina hruai kir zawng zawng hi an vaiin chhungkaw 11-a puitling 23 leh naupang 17, an vaiin mi 40 an ni a, Mamit district chhung khaw hrang hrang – Saikhawthlir, W. Bung-hmun, Damparengpui leh Tui-puibari khuaah te hruai an ni.
Mamit DC chuan Bru hruai kir thawh 9-na chhung hian Mamit district mi leh sa chhungkaw 145 hruai kir an nih tawh thu leh heng Bru hruai kir te hian an awmna tur khua an thlen veleh chhawmdawlna an dawn tur ang ang pek nghal zel an nih thu a sawi bawk.
Nimina Naisingpara camp aṭanga chhungkaw 6 hruai kir te hi Bru NGO-ten Central sawrkar kar nana October ni 31-a kawng an dan hnua Tripura Bru Camp hrang hrang 6 aṭanga hruai kir leh hmasak ber te an ni.
Tarlan tawh ṭhin angin tun thla ni 8-a Mizoram sawrkar, Council of Minister ṭhukhawm chuan Bru hruaikir hna hi ruahman lawk angin tun thla ni 30 thleng kalpui ni se, a hnu lamah chuan hruai kir hna hi thawh tawh loh ni se, tiin thutlukna a lo siam tawh a ni.
Bru hruai kir thawh 9-naah hian district 3 – Mamit, Kolasib leh Lunglei district-a awm tur Bru chhungkaw 4,447 hruai kir tura ruahman nimahse nimina mite nen chhungkaw 232 chiah hruai kir an la ni.