Union Principal Secretary & Financial Adviser-in -in KMMTTP kawngpui sial mek a tlawh

Myanmar nena inkal-pawhna tur kawngpui sial mek, Kaladan Multi Modal Transit Transport Project (KMMTTP) chu sawrkar laipui, Ministry of Road Transport and Highway Principal Secretary leh Financial Adviser ni kawp, Shambhu Singh chuan Pathianni khan tlawhin bawhzui ngaite Delhi a thlen hunah a bawhzui nghal tur thu a sawi.

Shambhu Singh hian Pathianni khan helicopter in Lawngtlai a thleng a, Helipad-ah Lawngtlai DC bakah Lawng-tlai East MLA H.Biakzaua leh Official pawimawh dang ten lo hmuakin, Lawngtlai East MLA hian Lawngtlai-III leitlak-hniamna laia National Highway a pin vanga Lawngtlai leh Siaha District mipuiten an tawrh nasatzia hrilhin, helai hmun hi tlawh turin a sawm a, MLA sawmna hi ngai pawimawhin, Principal Secretary hian a tih tura ruahmante a tih hmain, Lawngtlai-III leit lakhniamna lai hi a tlawh a, helai a harsatna thleng chu a theih ang anga lo enzui a tum thu a sawi.

Hemi hnu hian KMMTTP kawngpui hi Lawngtlai AOC veng aṭanga Myanmar ramri thleng zawhin a en a, PWD leh kawng sial hna thawktu Company-ten harsatna an tawh ṭhin, leimin nasa lutuk ṭhinte a hmunah a theih ang ang an enpui bakah helai kawngpuia Lei 8 dawh tur pawh a thlir bakah India leh Myanmar inrina laia Lei dawhkai tura ruahmanna awmte a en bawk.

Shambhu Singh hian KMMTTP-a hmalak chhun-zawm nana ṭul pawimawh leh Lawngtlaia tlawhnaa bawh zui ngaite chu Delhi a thlen thlak hunah a ṭul anga lo enzui nghal a tum thu a sawi a ni.

MoRT&H Principal Secretary hi Pathianni zan khan Lawngtlaiah riakin nimin khan Lawngtlai a chhuahsan a ni.

RELATED ARTICLES
November 11, 2019
November 8, 2019
November 8, 2019
November 6, 2019
November 6, 2019

Leave a Reply

This site uses Akismet to reduce spam. Learn how your comment data is processed.