Zothlifim Logo
Loading ...

Conor McGregor chu UFC 246-ah octagon-ah a kir leh a, Las Vegas-ah hian American fans ṭan zawk, Donald ‘Cowboy’ Cerrone chu second 40 chhung lekin a hneh a ni.

Kum 31 mi, Irish McGregor leh Cerrone-te insual hi T-Mobile Arena-a inbei zinga mipuite hmuh châk ber a ni a, UFC fighter lâr pahnih insual tur hian mite ngaihven a hlawh a, UFC ngainatu tam takin a insual an enchâk ṭhin McGregor tan meuh pawh a career-a a hmuna entu a ngah ber ṭum a tling hial a ni.
Cerrone hian McGregor hi a pêt a, McGregor chu lo indangin a pêt lêt a, Cerrone bek ding lamah chiang takin a pêt fuh a, Cerrone lu a hai deuh tih a hriat a, hei hi McGregor chuan bawhzuiin a hnek tlu chu a hnek zui mial mial a, referee Herb Dean chuan insual chu a titawp zui ta a ni.

An insual zawhah McGregor chuan, “Zanin hian history ka siam a, record thar ka siam a ni. Kei hi UFC history-a featherweigt, lightweight bakah tunah welterweight nen, weight division pathumahte knockout hmanga hnehna chang thei hmasa ber ka ni a, hei vang hian ka inchhuang hle a ni,” tiin a sawi.

McGregor hian November 2016 hnu khan Octagon-ah hian hnehna a la chang leh ta lova, October 2018-a UFC 229-ah khan hneh loh la nei lo, UFC lightweight champion Khabib Nurmagomedov khan a title kawl lai pawh a laksak a nih kha.

McGregor hian welterweight title kawl lai Kamaru Usman emaw, UFC ‘BMF’ champion Jorge Masvidal emaw a tum leh mai thei a, hetihlai hian Nurmagomedov chu lightweight belt chuhpui tura rematch neihpui a châk thu pawh a zep lova. Hei bakah hian MMA pawn lam-ah Mayweather nen rematch nei leh thei an ni bawk a, tunhnaiah Manny Pacquiao chu McGregor nena inhnek ngaihven anga sawi a ni bawk.