Sawrkar hriatpui loha din, Lunglei district-a khaw hrang hrang chu nimin aṭang khan sawrkar-in enfiah tura a ruatten an zirchiang ṭan.
Dân loa khaw din leh heng khuaa chengte zirchiang tur hian Mizoram sawrkar chuan team 7 a din a, team hrang hrangte hian Lunglei district huamchhunga dân loa din nia hriat khaw hrang hrangte a hmunah tlawhin, heng khuaa chengte pawh a ṭul anga kâwm chiangin an chhui nghal dawn a ni.
Tun ṭuma sawrkar-in dân loa din khuate zirchian a tum dan hi, kum liam taa Joint Inspection Team a dinten an zirchian dan nen a danglam hlek dawn tih a buaipuitute chuan an sawi a, kum kal ta kha chuan heng khaw hrang hranga chengte hmun khata sawi khawm dan tur ngaihtuah a nih laiin, tun ṭumah erawh heng khuaa chengte chu an ṭobul chhuichian a nih hnu-ah, India khua leh tui an ni tih nemngheh-na nei lote chu an khaw pang-ngaia thawnkir dan tur thlengin ruahmanna siam tum a ni.