ZORO-in Zo Hnam Inpumkhatna seminar buatsaih

Zo Re – Unification Organisation (ZORO) thalai Headquarters Aizawl chuan nimin khan Central YMA Hall, Aizawl ah Zo Hnam Inpumkhatna seminar an buatsaih.

He huna thusawitu ZORO ṭhalai president L.Ramdinliana Renthlei chuan, “ZORO chu political party a ni lova, Zo hnam inpumkhatna atana beitu leh hmalatu a ni.” a ti a, “Zo hnam chi peng hrang hrang kan awm a, kan unau khaw eng la hmu ve lo hi tam tak an awm. Kan tawng leh ziarang thlengin Khawvel politics kalsual vangin a lo danglam a, kan unau ngeite kha unau lo emaw tiin kan inhai fova. Kan unaute ngei pawh, ‘Mizo emaw ka tia,” tia thalaiten kan lo sawi thinte hi tihbo a hun tawh. Aizawl thalaite hian kan unaute hi kan hmusit mai ang tih a hlauhawm a, tawng avanga unau ni lovin thisen avanga unau kan ni. Hengte suihkhawm hi ZORO chuan a tum a ni. Kan unau khawhar taka hnam dang kara awmte chhanchhuah hi Mizorama zofate mawhphurhna a ni. Zofa khawvel puma nuaih 50 vel awm hi kan insuihkhawm a, kan inpumkhat tlat chuan hnam zahawm tak kan ni thei ang. Khawi hmunah pawh Zofa chi peng hrang hrangten hmuhsitna emaw harsatna an tawh chuan ZORO thalai chuan hma a la zel dawn a ni.”, a ti bawk.

ZORO President R Sangkawia chuan, “Zo hnam tungding turin ZoRO hian a bei a. Zo hnam inpumkhatna atana beih hi kan tum bei a ni,” a ti a, “Zo hnam peng hrang hrangte insuihkhawma rorelna pakhat hnuaia awm hi ZORO hmalakna a ni a. Heng hnam hrang hrangte hian tawng hrang hrang kan nei theuh a, heng tawngte hi Zo tawng vek a ni a. Miin Lusei/duhlian a hman loh vang khan Zo ta lo riauah ngaih tur a ni lova, unau kan ni a, kan inpawm thiam a pawimawh a ni.” a ti bawk.

He hunah hian Prof Jangkhongam Doungel, MZU chu resource person niin, Zofa hmun hrang hranga awmte chanchin zirchian a ni a, Zofate inpumkhat a ṭul zia leh a pawimawh zia te an sawiho a. Hemi bakah hian Zo hnam movement hrang hrang lo intan dante leh zo hnam movement hrang hran te leh Zo hnam inpumkhatna atana hmalakna hrang hrangte Prof Jangkhongam Doungel hnen atangin ngaihthlak a nia, sawihona hun hawn a ni bawk a.

Prof Jangkhongam Doungel chuan, “Zofate kan tih hian Zohnahthlak zawng zawng Chhinlung chhuak zawng zawng hi a huam vek a ni. Zofate luahchin ram hi a zau em em a ni. Zofate hi a then ah chuan Chin te, Kuki te leh Mizo/Zomi tih te in min sawi thin a. Heng zawng zawng hi kan nihna vek a ni a. Zofa intih hian kan inlungrual deuh ber a, pawm pawh a nuam ber a ni. Zofa han tih hian a huamzau ber bawk a ni. Mizoram hi a ropui kan duh a, changtlun kan duh a, zahawm kan duh chuan hmun danga zofate te nen kan inlungrual a kan tanrual a ngai a ni.” a ti.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram