SEDP la sem thei lo MPCC-in mak an ti

Mizoram Pradesh Congress Committee (MPCC) chuan thuchhuah siamin, MNF sawrkarin SEDP atan Budget-ah cheng nuai 75,000 a dah chungin tun thlengin SEDP cheng khat pawh an la sem thei lo tih an sawi.

MPCC chuan MNF sawr-kar-in kum 2019-2020 budget-ah SEDP kalpui nan cheng nuai 75,000 an dah tih an sawi a, tunah hian financial year a tawp dawn ruai tawh a, financial year thar atana budget session neih a ni leh tawh chung pawhin Mizoram-ah SEDP ṭanpuina sum dawng pakhatmah an la awm lo tih an sawi a, MNF party chuan kum 2018 MLA inthlan dawn khan chhungkaw tin hnenah cheng nuai 3 sem an intiam a, MNF President, CM ni mek Zoramthanga ngei chu chhungkaw tina nuai 3 sem tiamtu a ni a, a tiam lai ngei video pawh hmuh tur a la awm reng a ni, an ti.

MNF sawrkarin SEDP atana cheng nuai 75,000 a dah chu Mizoram budget ngaihtuah chuan a tam hle a, Mizoram budget 2019-2020 aṭangin 7% zet a ni tih an sawi a, sawrkar department hrang hrangte zingah SEDP atana an sum dah aia budget nei tam chu Department 3 – Finance Department, Home Department leh School Education chiah an awm a, department dang lian tak tak PWD, Rural Development, P & E leh Health Department-te budget ai pawhin SEDP-a an sum hlawm dah hi a tam zawk tih MPCC chuan tarlangin, Mizoram budget-a cheng nuai 75,000 dah a ni chunga MNF-in an intiam anga cheng nuai 3 an sem thei lo chu mak an tih thu an sawi a, chhungkaw pakhatah SEDP cheng nuai 3 zelin sem nise budget-a an sum dah hian chhungkaw 25,000 a daih avangin chhungkaw pakhatte mahin an la dawng lo chu a mak takzet tih an sawi a, financial year a tawp tawh dawn mai si avangin SEDP atana an sum dah zozaite chu eng atan nge an hmanral tih sawifiah tura an phût thu an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram