Darkar 24 chhungin India ram chhungah Coronavirus kai finfiah thar mi 149 an awm belh a, hei hi India rama ni khata coronavirus kai finfiah thar tam ber a ni.
Heti hian coronavirus kai hi India ram pumah mi 873 tlingin, mi 19-in an thihpui tawh tih Union Health Ministry chuan a tarlang.
Covid darh zel tur venna atana ram chhunga thlawhna service March ni 31 thlenga tihtawp chu April ni 14 thleng atan pawhsei leh a nih thu nimin khan DGCA chuan a sawi a, International flight chu April ni 15 thlenga tihtawp a lo ni tawh a ni.
World Health Organisation chuan Covid-19 vaccine hi thla 12 – 18 chhung velin peih a nih beisei a nih thu a sawi a, khawvel ram hrang hrangte chu he hrileng do kawngah hian lungrual taka thawkho turin a sawm a ni.
Hetihlai hian Unites States-ah chuan coronavirus kai finfiah zat hi mi nuai khat an tling tawh a, an ram sana (eastern time)-a Zirtawpni tlai dar 6 (22:00GMT)-ah chuan coronavirus kai finfiah zat hi mi 100,717 niin, mi 1,544-in an thihpui tawh a, New York khawpui chu a tuar nasa ber niin, coronavirus kai zawng zawng zatve deuhthawh hi an kawl a, New York-ah hian mi 280 velin an thihpui tawh a ni. Hetihlai hian US-a thi zat percentage hi 1.5% niin, Italy (10.5%) ai chuan a hniam hle thung a, US a hniam viau nachhan hi sample test an kalpui nasat vang niin a lang a ni.