Dr. K.Beichhua-a’n Epidemiological Centre a hawng

Animal Husbandry & Veterinary Department Minister Dr. K.Beichhua chuan nimin khan Aizawl AH & Veterinary Complex-ah Epidemiological Centre a hawng.

Dr. K.Beichhua chuan Epidemiological Centre hawn thar hi ran hriselna lam chauh atan hman a ni dawn lova, ran leh mihring in kai chhawn theih natna pawimawh tak tak endikna tur hmun a ni a ti a, Ran natna chi hrang hrang len thin dan te, natna darh dan a, a venna lam thlengin he Centre hian hma a la chho dawn a ni, a ti.

Minister chuan, PCR hmangin molecular diagnosis te pawh a tih theih dawn a, hei hi A.H & Veterinary Department hlawhtlinna chauh a ni lova, state pumpui tana rotling tur a ni dawn a ni a ti bawk.

Epidemiological Centre din tur hian kum 2016 March ni 11 khan bul ṭan a ni a, Rural Infrastructure Department Fund- XXI hnuaia hna hi thawh a ni a, RIDF aṭangin cheng nuai 304.95 leh state aṭangin cheng nuai 16.05, a vaiin cheng nuai 321-a sak zawh a nih bakah Laboratory bungrua hrang hrang pawh lei a ni.