Assam leh Mizoram ramri buai chinfel a la ni lo

Home Minister Lalchamliana chuan Assam leh Mizoram rami buai hi chinfel a la nih loh thu a sawi.

Mizoram Assembly Session neih zawh taka Thorang bialtu MLA Zodintluanga Ralte ziaka zawhna chhângin, Home Minister chuan Assam nena Mizoram ramri buai chu Mizote duh danin chinfel a la ni lo, tih a sawi a, chinfel a nih loh chhan hi state pahnihte ngaihdan leh pawm dan inang lo chu central sawrkar pawhin a hriatpui thua chhangin, state pahnihte ramri chinfel a nih theihnan central sawrkarin hma a lak mek thu leh chinfel a nih theih hun tur sawi theih a nih loh thuin a chhang a ni.

Assam leh Mizoram ramri chungchangah INC member KT Rokhaw ziaka zawhna chhangin, Lalchamliana chua Mizoram leh Assam ramri buai chinfel a nih theih nan Mizorama pawl hrang hrang intelkhawm, Joint Action Committee on Inner Line Reserved Forest Demand-ten boundary commission an din bakah, Inner Line Reserved Forest, 509 sq. miles a zau chu a pumpuia Mizoram sawrkar kuta hlan lêt tura ngenna, Prime Minister hnena an thehluh chu Mizoram sawrkar chuan a thlawp (endorse) thu Home department, Government of India lehkha (No.F.20015/5/2020-HM dt. 16.10.2020) hmangin Ministry of Home Affairs (MHA) a hriattir tih a sawi.

Home Minister chuan, MHA aṭanga lehkha hriat-tirna an dawn bawhzuiin, Mizoram leh Assam ramri buai chungchanga indawrna/ inbiakna neihna atan Nodal officer ruat a nih thuin a chhang a, MHA-in Mizoram leh Assam ramri buai zirchiang tura nodal officer a ruat, Manish Tiwari, Jt. Secy. (Jammu, Kashmir & Ladakh Division) chu December ni 28, 2020 khan Chief Secretary’s Conference Room, Mizoram Secretariat-ah meeting neih pui a nih thuin a chhang bawk.