Peoples’ Conference (PC) Party Senior Vice President Vanlalruata chuan “Kum 2021-2022 Mizoram Budget-ah tlangram lo neite tan pawisa pakhat mah dah a ni lo chu PC Party chuan pawi kan tiin kal dan thlak a ngai kan ti,” a ti.
Inrinnia PC Party Office-a thu a sawinaah Vanlalruata chuan, “Mizorama mihring tam berte hi loh theih lohna avangin tlangram lo neihah kan la innghat a. Sawrkar leh mi thiam tam takin tlangram lo neih hlawk lohzia leh lo vah leh hâlin environment a tihchhiat nasatzia an sawi chungin kan la bansan thei lo. Mizoram budget kal tawhte uluk taka zir chianin tlangram lo neih tihhmasawn tumna leh tlangram lo neih aṭanga thar chhuah tihhlâwk tumna mumal a awm ngai reng reng lo a. Tuna Assembly House-a an sawiho chhoh mek budget thar turah pawh hian tlangram lo neih tihhmasawnna leh tlangram lo neitute hamṭhatna tur cheng khat mah dah a ni lo. Hei hi PC Party chuan ṭha kan ti lo a, hemi kawnga sawrkar kal dan hi thlak a ngai kan ti hle,” a ti.
“Niminah Chapchar Kut kan lawm zo chiah a. Kum tin mipui sum (sawrkar sum) tam tak tak sengin he kut hi kan lawm ṭhin a, kan hnam thil pawimawh a nih avangin thil ṭha leh uar zel kan duh; amaherawh chu a Kût neitu, tlangram loneitute hamṭhatna tur leh hmasawnna tur ngaihtuah si lova Kût lawm leh chiam ṭhin hian hmasawn-na kawngah min hruai lo a. Chapchâr Kût neitute tan sawrkarin hamṭhatna a ngaih-tuah tur a ni,” tiin, tlangram lo neih tihhmasawn leh tihhlawk tuma hma la thuai tura sawrkar a duh thu a sawi bawk.