Nguna hnena ngaihdam dil turin Law Minister phût

Mizoram Pradesh Congress Committee (MPCC) chuan Mizoram Legislative Assembly Budget session neih meka Congress MLA C. Ngunlianchunga chunga Law Minister TJ Lalnuntluanga chet danah Minister hian ngaihdam dil ngei turin an phut.

Nimin khan MPCC chuan Aizawl Press Club-ah thuthar thehdarhtute an kawm a. March ni 15, 2021 khan Law Minister TJ Lalnuntluanga’n Lawngtlai West bialtu MLA C.Ngunlianchunga’n thu a sawi laiin member senior zawk zah derhna nei miah lovin, Govt Chief Whip a nihna hmachhuanin ṭangkam mawi lo tak taka a beih chu duhtawk mai lo a, house pawn thlenga umzuiin ṭawng-kam mawi lo tak taka a beih zui bakah kut thlak hial a tum chu pawi an tih thu leh an ngaih thutak thu an sawi.

MPCC thupuangtu Dr Lallianchhunga chuan, TJ Lalnuntluanga’n chhim lam a va tlawh ṭuma a thusawi kha Congress MLA C.Ngunlianchunga’n sawi chhuakin, ‘tun dinhmunah Covid-19 laka kan him theihna chhan hi kan Chief Minister in Pathian a ṭih vang niin ka hria,’ tih a sawi chhuah chu voice record dila, a thusawi chiang taka TV leh chanchinbu mai bakah, an party press release ngeia lang tawh phat a tum hi house leh member, party media leh chanchinbumite zah lohnaa an ngaih thu a sawi a.

Law minister TJ Lalnuntluanga hi aia upate kutthlak hial pawh pawisa lo a chet a thawh duh dan thlir hian ram rorelna khawla tawnhriat la nei lo leh hnuhma ṭha lo tak tichhuaktuah an ngaih thu an sawi a. Law Minister hian March ni 16, 2020 ral hma ngeiin C.Ngunlianchunga hnenah ngaihdam a dil mai bakah, mipui hriat turin ngaihdam dilna statement siam ngei tura ngenin, an ngennain awmzia a nei lo a nih chuan MLA thlavang hauhin a ṭul anga hma an lak zel tur thu an sawi a ni.

Nimin chawhnu dar 2:30 khan Congress party chuan party hruaitu hrang hrangte Congress Bhawan-ah inkokhawm nghalin, ngaihdam dil tura an ngennain awmzia a neih loha an hmalak zel dan tur an rel nghal a ni.