Sawrkarin sum inrenchemna tur zirchianga thurawn petu tur Committee a din thu CM-in a sawi

Assembly session neih mekah nimin khan Mizoram sum leh pai dinhmun tiṭha tura Mizoram sawrkarin hma a lakna chungchangah eptu member Zodintluanga zawhna chhangin Chief Minister leh Finance changtu Zoramthanga chuan finance commissioner kaihhruaina hnuaiah May ni 1, 2020 khan Covid-19 hripui lengin harsatna a thlente zirchiang a, hemi avanga inrenchem tur leh thurawn pe turin Committee din a nih thu house a hrilh.

Chief minister chuan, committee-in rawtna hrang hrang a siam a, chung rawt-nate chu sawrkarin a pawm hnuah a taka hmang turin lehkha tihchhuah nghal a ni a, head hrang hrangah sum dahte chu tihhniam a nei a, thil dang hrang hrangah pawh sum inremchemna hi kalpui a ni, a ti a, sum inrenchemna tura hma a lak piah lamah hian sum lak luh theihna kawng hrang hrangte ngaih-tuahin, sawrkar laipui lamah pawh scheme awm thei ang hrang hrangte sum hmuh theihna te bawhzuiin, state sum indaih lohna tiziaawm tur hian sum puk pelh a nih thu a sawi bawk a ni.

Kum 2020 a health department audit chungchang-ah finance changtu chief minister chuan, kum 2020 a health dept. sum hman dan endik a nih chhan chu Covid-19 avangin sum hlawm lian tak tak, hmanraw chi hrang hrang, emergency a lei ngai tam tak a awm a, financial rules te, accounting procedure-te ngaihthah a hlauh-awm em em a, nakin hunah AG lam audit hunah harsatna nasa zawk a awm loh nan leh an lo inven thiam nan internal audit anga kalpui a ni, a ti a, thil fello lian tham hmuh a ni lo tih a sawi bawk.