Serchhip biala MLA by-election neih turah din tum an pung zel

Serchhip: Serchhip bial MLA by-election neih turah Mizorama political party lian pathumten an candidate tur an puanfel hnuah BJP leh independent-a ding tur an awm belh leh tawh.

Serchhip biala MLA by-election neih turah Serchhip bialtu MLA aṭanga bân tak Lalduhoma chu ZPM party chuan MLA aṭanga bân a nih hnu lawk khan Serchhip bial by-election neih turah hian an party candidate a ni leh dawn tih an puang zui a, hemi hnu hian Congress pawhin Serchhip bial chhung mi nia chhal theih, PC Laltlansanga chu an candidate a nih tur thu an puang a, Mizorama sawrkarna chelh mek, MNF party pawhin an party vice-president Vanlalzawma, Lok Sabha MP leh MLA pawh lo ni tawh chu an official candidate a nih tur thu an puang tawh tawh bawk a ni.

Inrinni khan Serchhip Vengchunga hun rei tak lo khawsa tawh Ramhlun Edena chuan Serchhip biala MLA by-election neih turah independent-in a ding dawn tih a sawi a, Ramhlun Edena chuan hemi chungchangah hian “Mizoram chu a chhiat loh nana dai theu tur leh, kan ram chhana Lalpa Krista Isua hmaa ṭang turin, Serchhip bial by-election-ah Vohbik Ephraim Israelte an lo lang ve ta e,” tia sawiin, Vokbik Ephraim Israel hmingin independent-in a din a tum a ni.

Inrinni vek khan BJP pawhin MLA by-election neih turah hian Serchhip bial chhung mi, Hriata Chhangte an vawrh chhuak ve dawn tih sawi awm a, hemi chungchanga Zothlifim-in a biak pawhnaah Hriata Chhangte chuan he thu hi thudik a nih thu sawiin, tunkar chho hian BJP chuan an candidate tur hian official-a puan chhuahna neih an tum tih a sawi a, Serchhip bial a hmangaih avangin Central-a sawrkarna chelh mektute aṭanga Serchhip bial hmasawnna tam zawk hailuh theih beiseina avangin BJP-in an sawmna chu, chhungkuaa Pathian rawn chunga an ngaihtuah hnuah a pawm ta tih a sawi a ni.

Heng bakah hian PC party pawhin Serchhip biala by-elecrion neih turah hian an party-in candidate siam ngei an tum thu an lo sawi tawh bakah an candidate tur pawh an tichhiang tawh a, amaherawhchu inthlan puan hunah an candidate tur hi official-a puan chhuah chauh turin thu an dah a, an party Sr. Vice President, Vanlalruata chu by-election-ah hian an dintir leh rin a ni a, ani hi kum 2018 inthlanpuiah khan PRISM party aiawhin Serchhip bial-ah khan a lo ding tawh a ni.