Tukin dar 4 aṭang hian sawrkar chuan khauh lehzualin pawnchhuah khap leh inkhuahkhirhna a kengkawh dawn a, hei hi ni 8 chhung, May ni 11 zing dar 4 thleng a ni ang.
Thudawn danin chawlh-kar hnih chhung inkhuah-khirh a nihlai khan pawn chhuak leh lirthei chhuak an tam tho va, khawlaiah mipui awmkhawm awm rengin, inkhuahkhirhna dân bawhchhia man tur an awm reng a. Hetiang a nih avang hian hri kai hmuhchhuah an tlêm chuang lo mai nilovin an pung chho zel a, chubakah phailam aṭanga lo haw aiin tualchhunga kai zat an tam zawk hle a, kaina hriat loh tam tak an awm bawk a. Sawrkar chuan mithiamte leh pawl liante râwnin khauhzawka pawnchhuah khap (lockdown) hi kenkawh a titlu ta a ni.
Tuna inkhuahkhirhna kengkawh tur hi inkhuah-khirhna hmasa zawk inkaih-hruaihna nen a inang tlangpui a, hemi inkhuah-khirhna hun chhung hian tumahin mahni in/ compound an chhuahsan tur a ni lova, building khata in hrang hrang luahte pawh intlawhpawh loh tur a ni a, amaherawhchu, ṭul bik thil vanga chhuah ngaite chuan an awmna VLTF/LLTF te phalna an la hmasa tur a ni a, hemi hun chhung hian lirthei veivah pawh khap tlat a ni a, amaherawhchu, hei hian inkaihhruainain phalna a pekte leh VLTF/LLTF ten phalna/hriatpuina an pekte chet velna lirthei a huam lo a, zirna in, sakhaw hmun leh mipui punkhawmna hmunte chu hawn phal a ni lova, inneihna leh mitthi vuinaah mi 30 aia tam kal phal a la ni lo bawk.
Hetihlai hian DIG (Northern Range) Lalbiak-thanga Khiangte-hoin Mizoram Police hotute chu nimin khan Aizawl SP Conference Hall-ah an ṭhukhawm a, Mizorama Covid-19 hri darh chak zel vênna kawnga police duty dan ennawnin leh khauh zawka kal dan tur an ngaihtuah a ni.