Gauhati High Court Aizawl Bench-in kumin January 27-a Mizorama lui 16 kam Reserve ṭhiahna thupek a chhuah chu Central YMA Executive Committee Inrinnia ṭhukhawm chuan court thuneitu sâng zawka zualko a nih ngei theih nan sawrkarah thlen ni se tiin an rel.
CYMA General Secy Prof Lalnuntluanga sawi danin kar thar lo awm turah sawrkar hnenah appeal a nih theih nan thlen an tum dawn tih a sawi a, ṭawngka chuan sawrkar hotute an hriattir tawh tih sawiin, High Court thutlukna chhuah tirhin Chief Minister hnenah appeal tura rawtna an thlen tawh thu an sawi a, amaherawhchu CM-in appeal an tum loh thu leh Riverine Reserved Forest a nih chhung chuan Ministry of Forest, Govt of India an thu dawn avangin appeal loa Executive order-a sawrkarin humhalh zawk an tum tih CYMA hruaitute chuan an sawi a. Tunlaiah lui hnar a chat nasa tawh tih sawiin, Riverine Rerserved Forest dan hnuaiah lui dungte chu humhalh zel ni se an duh thu an sawi a, Mizoram sawrkar kuta awm tur angin executive order awm tawh mahse appeal leh a tihdanglam a nih an beisei thu an sawi a ni.
Mizoram Luipui 16 kam ramngaw lui aṭanga meter 800 hi Riverine Reserved Forest (RRF) huamchhung a ni a, Forest humhalh ram niin, mi tumah tan ram neih phal a ni lo a, hmasawnna hna pawh thawh phal a ni lo. Heng Lui 16 leh a kam Meter 800 humhalhna dan RRF Notification January ni 28, 1965-a chhuah chu Gauhati High Court, Aizawl Bench chuan kumin January 27 khan a ṭhiat a ni.