Serchhip bial MLA by-election-a vote tlate chu naktuk, May ni 2, 2021 hian chhiar a ni dawn ta a, vote chhiar tura inbuatsaihnate engkim peihfel a ni tawh.
Nimin khan Serchhip District Magistrate Kumar Abhishek, IAS, By-Election Returning Officer ni bawk leh Stephen Lalrinawma, SP, Serchhip-te chuan DC Meeting Hall-ah vote chhiar nia inbuatsaihna sawifiahin joint Press Briefing an nei a, he hunah hian Kumar Abhishek chuan vote chhiar tura inbuatsaihna te chu zawhfel vek tawh niin, vote chhiar tura an inpeih tawh thu a sawi a. DC Conference Hall chu counting hall atana buatsaih a nih thu sawiin Covid-19 himna dante zawm chunga vote chhiar nan a zauh tawk thu a sawi a ni.
Vote chhiar hna hi micro-observer 10, counting supervisor 8, counting assistant 10 bakah data entry operator leh supporting staff-ten Returning Officer leh Asst. Returning Officer-te kaihhruaina hnuaiah an thawk dawn a, Election Com-mission of India dân angin candidate leh an counting agents-ten counting hall chhungah hian an ṭhutchilh ve dawn bawk a, Vote chhiar-na dawhkan hi 7 a awm dawn a, polling station 29-a vote tlate hi round 5-a chhiar zawh tur niin, EVM-te chhiar a nih zawhah VVPAT 5 chu ECI dan anga EVM-a vote tlate nena khaikhin chunga chhiar leh tur a ni dawn a. Round tin result-te hi RO’s Media room leh By-Election Media Centre kaltlangin media mite hnenah rang taka pek chhuah ṭhin turin ruahmanna siam a ni.
Vote chhiar niah hian Covid-19 hripui leng mek laka himna tur dan Election Commission of India leh Mizoram sawrkar thupek hrang hrangte ṭha taka ken-kawh tur a ni a, hei vang hian counting hall mai nilovin Counting Centre/campus (DC Office huam chhung)-a vote chhiar nia lût thei tur chin hi uluk taka thliarfel niin, phalna nei chauh helaiah hian luh theih a ni dawn a, Counting hall leh a chhehvel venhimna hi security thuah thum (3)-a kalpui tur a ni a, phalna neite chauh luh theih a nih dawn avangin phalna lehkha nei lote chu result ngaichanga Counting Centre (DC Office Complex) pan lova media kaltlanga lo ngaichang zawk tura ngen an ni.
Election Commission of India chuan vote chhiar nia vote chhiartute leh candidate leh an aiawh party mite Covid-19 laka an himna tur dân felfai tak a duang a, vote chhiar nia ‘chak lawmna pun khawm’ huaihawt pawh khap niin, Certificate of election dawng tur pawhin mi pahnih aia tamin candidate thlan tlin thar chu an zui phal a ni dawn lo a ni.
He hunah hian Stephen Lalrinawma, SP, Serchhip pawhin vote chhiar nia venhimna hnathawh dan tur tlangpui sawiin, venhimna hmasa berah MRP an duty dawn a, a thuah hnihnaah SAPF leh a thuah thumnaah CAPF an duty dawn tih sawiin, vote chhiarna bakah hian hmun danga buaina thleng thei pawh vil reng a ni dawn tih a sawi bawk.
Media miten zawhna an neihte leh sawi tur ṭul dangte sawihona neih zui a ni bawk.
Press Briefing hi Amol Srivastava, IAS, Asst. RO, Lalmuansanga Ralte, Addl. DC, K.Saitluanga, Media Nodal Officer leh mi pawimawh dangten an ṭawiawm a ni.