Serchhip District-a inkharkhipna kalpuina tur thupek tichhuak

Mizorama Covid-19 hri lêng hluar zel laka mipuite kan him theih nana Vawiin, May ni 1, 2021 zing dar 4 aṭanga May ni 11, 2021 zing dar 4 thlenga inkhuahkhirhna khauh lehzual, inkharkhipna ‘lockdown’ thupek Mizoram Sawrkarin a tihchhuah chu Serchhip District Bawrh-sap, Kumar Abhishek chuan Serchhip District-ah pawh kalpui tur a nih thu thupek a tichhuak a, Mizoram sawrkarin inkaihhruaina a siamte chu Covid-19 laka Serchhip District mipuite an lo hima Mizoram a him theih nan mi zawng zawngin ṭhahnemngai taka zawm tur a ni tih a tarlang.

District Bawrhsap hian he inkharkhipna kalpui tur bawhzui hian nimin khan District Hqrs. chhungah, zan dar 7 leh zing dar 4 inkara pawn chhuah khapna thupek a tichhuak nghal a, he thupek hian Magistrate leh Police duty; District Level Task Force on Covid-19 member te; Army, BSF, Assam Rifles leh paramilitary forces duty te; Damdawi ina thawk doctor, nurse leh thawktu dang night & emergency duty te; PHE, PWD, P&E, Fire & Emergency Services leh Excise & Narcotics Department leh Jail-a thawk, duty nei te; Village Level Task Force on Covid-19 duty-te; Medical emergency leh damlohna thil leh chhiat tawh thila veng danga kal ngai, an veng VLTF phalna lehkha keng te; Essential commodity phur te; I&PR official zan duty nei te; Print & Electronic media lama thawk te; Covid-19 Executive Duty tura ruat sawrkar hnathawk te leh District Magistrate/ Addl. District Magistrate/ Sub-Divisional Officer(Sadar/Civil)-in a bika phalna a pek te a huam lo tih a tarlang bawk.