Nimin khan Serchhip bial MLA by-election-a vote tlate chu chhiar zawh niin, Serchhip bialtu MLA aṭanga bân tak, ZPM candidate Lalduhoma chu hneh taka thlan tlin a ni a, amah hnaih bertu, sawrkar lai MNF candidate Vanlal-zawma aia a vote hmuh tamna hi vote 2950 a ni.
ZPM Candidate Lalduhoma hian vote 8,269 hmu-in, hei hi vote tla zawng zawng 16,595 aṭanga chhutin za-a 49.83 a tling a, amah hnaih bertu MNF Candidate Vanlalzawma chuan vote 5,319 (32.05%) a hmu a, Indian National Congress candidate PC Laltlansanga chuan vote 2,604 (15.69%) hmuin, BJP Candidte Lalhriatrenga Chhangte chuan vote 250 (1.51%) a hmu a, Independent Candidate Ramhlun Edena chuan vote 43 (0.26%) a hmu a, PC candidate Vanlalruata chuan vote 38 (0.23%) a hmu a, NOTA-ah vote 32 (0.19%) tla-in Postal Ballot-a vote thlakah vote thi (rejected vote) 40 (0.24%) a awm a ni.
Kum 2018 MLA General Election-a thlan tlin lo ni tawh Lalduhoma hian kum 2018 khan vote tla zawng zawng 15,558 aṭangin vote 5,481 (35.23%) a hmu a, inthlan hmasa aia Lalduhoma vote hmuh tamna hi vote 2,788 a ni.
Result hriat hnuah MLA atana thlan tlin tak, Lalduhoma chuan inthlan-naa hnehna a chan chu, “Keima mimal hnehna a ni lo,” tiin, an hnehna chu bial mipuite hnehna a ni tih a sawi a, result puan hmain chak chu an inring a, mahse an chakna chu an beisei aiin a tam tih a sawi a, “MLA aṭanga an min bân aṭangin Pathianin thil tum a nei niin ka hria a, Pathianin min hruai a, Pathian hnenah lawmthu ka sawi a ni. Mimal leh kan party hi Pathianin chawisan min tum niin ka hria a, tuna thil lo thleng pawh hi ruatlawk thil niin ka hria,” a ti bawk.
Lalduhoma chuan amah an bânna Anti-defection Act chu MNF-in a letlingin an hmang tih a sawi a, a tira Law Court-a kal an tum tia a sawi chu “MNF-ho kha ka tihder ve a ni,” tiin a sawi a, Serchhip bial mi 2019-te ngaihdan an lak hnua mipui court-a kal zawk tura thutlukna an siam hnuah, “Serchhip bial mipuiten mipui court-ah thiam min chantir ta a ni,” tiin a sawi a, tun ṭuma hnehna an chan chun Serchhip bial mai ni lo, Zoram pumah ZPM a chawisan tur thu a sawi a, kum 2023 MLA inthlanpui lo awm leh turah pawh an party-in a ṭhat phah ngei a beisei thu sawiin, Lalduhoma chuan, “Nasa takin Zoram pumah ZPM a chawisang dawn a, hma kan sawn chho dawn a, tun aṭanga rei lo teah ZPM hian lawmluh thar tur kan nei duah dawn a ni,” a ti a, 2023 inthlanah chuan ZPM leh MNF-te an inbeih tur thu a sawi bawk.
Lalduhoma chuan ruling MNF lamin inthlan dawna thutiam an neih chu bawhzui a tum thu sawiin, “Education certificate xerox copy thehlut zawng zawngte ka hnenah rawn in-report se ka duh a. Muster Roll leh transfer an tiam te, housing loan leh nuai 3 sem bakah police ringawt pawh battalion khat hen vel an tiamte kan hria a, chuvang chuan ruling lamin min tiamkam a nih avangin kan bawhzui ang,” a ti a, Serchhip bial hi Mizorama development chakna leh bial hausa ber tur, sawrkar hnathawk tamna ber a nih tur thu leh Serchhip bial chu a vannei dawn tih a sawi bawk.