Mizoramin Oxygen plant a neihsa bakah District headquarters tinah dah belh a ni dawn a, PM Cares aṭangin 1000 LPM pahnih – ZMC-a dah tur pakhat leh Civil Hospital-a dah tur pakhat dawn a ni bawk.
He thu hi nimina Minis-ter Dr. R.Lalthangliana leh a department chan pathum – Health & Family Welfare, Commerce & Industries leh Higher & Technical Education hotuten ṭhutkhawmna-ah tarlan a ni a, hmun hrang hrang aṭangin mi inphalten Mizoram tan Oxygen Concentrator 1066 a thlâwnin an pe tawh a, chu’ng zinga 721 chu damdawi in leh CCC hmun hrang hranga hman turin thawn chhuah a ni tawh a ni.
Tun dinhmunah Covid-19 avangin Mizoram chhung hmun 43 chu containment leh micro containment zone-ah puan a ni a, vanneihthlak takin tun thlengin Mizoram-ah black fungus vei an la awm lo tih tarlan a ni a, report hnu-hnung berah ZMC-ah damlo 327 an awm a, Aizawla DCHC khum 159 awmnaah khum 129 a la ruak a, Mizo-ram sawkarin CCC 56 a neih mekah damlo 1413 an awm a, 4C 199 awm mekah damlo 1110 an awm a ni.
Zemabawk Cancer hospital sak mek chu thla 16 dangah chuan zawh theih beisei a nih thu sawilan niin, cancer hemna khawl ṭha chi Linear Accelarator (LINAC) khawl bun vek tawh a ni a, thawktute training pek mek niin, tun thla tawpah hman ṭan theih beisei a ni a. Inhemna khawl dang Cobalt 60 machine Equinox 80 pawh Mizoram a rawn thleng fel tawh a, a buntu tur engineer-te hri an kai avangin install mai theih a ni lo a, he khawl pawh hi bun theih thuai beisei a nih thu tarlan a ni bawk.
Commerce & Industries Department chuan hri leng vanga sa leh thlai man to uchuaka zawrh chhuah a nih loh nana an hmalak dan report-in, man to tak taka sawrkarin a lei ṭhin, PPE Set chu veng hrang hranga puanṭhuite eizawnna khaihlak mek puihna ni pahfawmin set khat zel Rs.600 manin an ṭhuitir a, heng puanṭhuite hian PPE 50 zelah Rs.7500 an hlawh thei nia chhut a ni a, a thawh khatnaah puanṭhui 300 an ruai mek a, puanṭhui 600 rawih tumin scheme hi siam a ni a. Tun dinhmunah PPE 200 Health Department-ah an hlan tawh a, vawiin hian 3000 dang hlan leh a ni ang a, a vaiin PPE 36,000 ṭhui an tum tih meeting-ah tarlan a ni. Interest Subvention Scheme for Entrepreneurs leh State Incentive Subsidy for MSME Sector hit by Covid-19 hnuaiah Industries Department chuan cheng nuai 292 a chang a, hemi hnuaiah State Incentive Subsidy bikah Entrepreneurs 44 hnenah cheng nuai 43 semchhuah a ni tawh a, Interest Subvention Scheme hnuaiah ṭanpuina dawng tur mi 180 thlan chhuah an ni tawh bawk.
Mizorama Higher Secondary School leh college-ah te hripui avanga class kal theih a nih tak loh avangin H&TE thupek angin online class neih ṭhin a ni a, sawrkarin zirlaite tan fee a tihhniamsak a, zirna tluang pangngai bakah rilru lama harsatna tawkte pui thei turin zirtirtute chu July thla khan Counselling and Mental Health training neihtir an ni a, RUSA hi phase-II kalpui mek a ni a, College sak thar, chei ṭhat leh mamawh lei kawngah nasa taka hma an lak bakah he scheme hnuaiah hian zirtirtu post 69 an hnawhkhat a ni.