Zothlifim Logo
Loading ...

Nimin khan Govt. Serchhip College zirlai naupangte chuan Exposure Visit neiin, PHE Department-in Serchhip mipuite châwmtu tui a lâkna, Greater Serchhip Water Supply Scheme an tlawh a, Tuikum luia tui an lâkna aṭanga tui an sem chhuahna thleng a hmuna kalin an en.

Govt. Serchhip College zirlai naupangte hi Sr. SDO, Er. Samuel LR Ralte chuan Tuikum khama PHE Department hmunah lo dawngsawngin, Serchhip khawpui tana tui lâk hna an thawh dan tlangpui a sawifiah a, Biakzamvela Sailo, Sectional Officer chuan zirlai naupangte chu tui lakna atana khawl hrang hrangin hna a thawh dante leh hmanrua an hman dante a hmunah kawhhmuhin a hrilhfiah a, zirlai naupangte hian zawhna an neih hrang hrangte an zawt nghal zel a ni.

He hun khârna hi PHE Department Control Room, Khawtetlangah Er. Samuel LR Ralte kaihhruaiin hun hman a ni a, he hunah hian Govt. Serchhip College Principal PC Lalremsiama chuan lui kamah tui a tam avangin tui hlutna a hniam a, Mizoram chu tlang rama kan awm avangin tui a vâng a, tui hi ‘economic goods’ a ni a, a hlu hle a ni, a ti a, zirlai naupangte chu PHE Department-in mipuite hnena tui sem chhuak tura an hnathawh hautakzia a taka an hmuh aṭangin midangte hnena tui hlutzia zirtir chhawngtu ni turin a chah a ni.

Er. F.Lalsanglura, Sr. EE pawhin thu sawiin, PHE department chuan kumin, 2021 chu ‘Tui hlut kum’-a an puan thu sawiin, zirlai naupangten an hnathawh dan a hmuna an hmuhpui chu lawmawm a tih thu a sawi a, PHE Department-in mipuite hnena tui sem chhuak tura an hnathawh dan chu mi tam takin an hriatpui loh avangin tui hlutna an hrethiam tawk lo ṭhin tih a sawi a, Mizoram chu tlangram a nih avangin mipuite hnena tui sem chhuah hna thawh chu a hautak hle tih a sawi a, an department-a hnathawktu zinga chhun zan zawma hnathawktu engemawzat an awm tih a sawi bawk.

Greater Serchhip Water Supply Scheme tlawhtu zirlai naupangte pawhin thu sawiin, PHE Department-in mipui hnena tui sem chhuak tura hna an thawh nasat dan a taka an hmu thei chu lawmawm an tih thu leh an hnathawh dan chu ropui an tih thu sawiin, khawl hna-thawh dan leh tui tihthiang-hlim dan hrang hrangte chu an hriatna a tihzauh phah bakah tui hlutna leh tui renchem a ṭulzia an hriat thar phah tih an sawi a, mi tam zawkin tui ren nachang leh tui hlut nachang an hriat theih nan PHE Department hnathawh dan chu a takin hmuhpui ve thei se an duh thu an sawi bawk.

He hun kaihruaitu Er. Samuel LR Ralte chuan Greater Serchhip Water Supply Scheme chu kum 1997 aṭanga hman ṭan a nih thu sawiin, a tira design dan chuan kumin hi a tawp kum a nih tawh thu a sawi a, a a tirah chuan nitin tui litre maktaduai 1.84 pump chhuak tura duan a ni a, tunah hian Serchhip mipui tui mamawh chu nitin tui litre maktaduai 2.6 – 3 vel a ni tawh a, tui pump-na khawlte leh hmanraw dangte chuan Serchhip mipui a châwm zawh tawh loh avangin tui pawh semrual a ngai tawh tih a sawi bawk.