Sub-Hqrs. YMA-in hnamdang vau leh rikrap lo turin ngên

YMA Sub-Hqrs. Ser-chhip chuan nimin khan thu-chhuah siamin, ramri buaina avanga kan rama hnamdang awmte (Vai) lo vau leh rikrap lo turin mipuite an ngên a, phai lama kan Mizopuite dinhmun thlir chungin dawhthei takin an chungah rilru ṭha pu tur leh boruak awmdan thlir chungin chêtlak dan turah YMA hruaitute thu ngaichang zel turin mipuite a chah a, ram leh hnam chhan tur leh ramri venghim tura a ṭul huna che chhuak thei turin YMA member zawng zawngte an ngen bawk a ni.

YMA Sub-Hqrs. chuan thuchhuah a siamah chuan, “Mizoram leh Assam ramri chungchangah Assam sawrkarin diklo taka kan ram min rawn chuh a, an Police chakna chhuanga kan ramri Police Duty Post min hnehchhuhin ralthuam hmanga Vairengte mipui an bei ta mai hi kan dem takzet,” tiin a tarlang a, silai an hmehpuah hmasak avanga inkahna lo thleng chungchangah Sub. Hqrs YMA Serchhip chuan Assam Sawrkar thiam lohah a ngai tih a tarlang bawk. .

YMA Sub-Hqrs. chuan Assam sawrkarin Mizoram nena inrina bakah a ṭhenawm ram (State dangte pawh) ramri a chuh buai reng mai chu an dem thu sawiin, Mizoram Police-te huaisenna leh Vairengte mipuite huaisenna leh inpekna ropui an tih thu leh an chhuan thu sawiin zahna chibai an buk a, ramri buai vanga mipuiten’ ei leh barah harsatna kan tawh loh nan sumdawng leh dawrkaite an bungraw man tito lo tur leh chheprelh lo turin an ngen a, a khairual zawnga bungrua hralh turin an ngen a.

“Tuna kan buaina hian Mizote inpumkhatna ṭha zawk min thlen se, pawl bik hamṭhat tum nana hmang lo turin mitin kan in ngen a, ṭanrual hi chakna a ni tih thupui hi i vawng reng ang u,” an ti a, rambuai karah hripuiin min tuam ve reng avangin Covid-19 laka theihtawpa fimkhur turin mipuite an ngen a ni.

Leave a Reply

This site uses Akismet to reduce spam. Learn how your comment data is processed.