State Immunization Officer Dr.Lalzawmi chuan Mizoram pumah tluang taka Covid-19 hri danna vaccine pêk chhuah a nih zel thu sawiin, nimina pekchhuahte nena belhkhawm chuan mi nuai 7 chuangin vaccine an lâk tawh thu a sawi
Dr. Lalzawmi chuan vaccine petute chu an thawhrim thu leh khaw ṭhenkhatah phei chuan tuilian leh leiminte paltlanga rim taka vaccine pe tura an thawhchhuah ṭhin thu a sawi a, Vaccine pek chhuah hna thawktute rim taka an thawh lai leh sawrkarin vawi khat vaccine lak man pawh to tak a thlâwn veka mipuite tana anmahni veng ṭheuha a chhawpchhuah sak chu thil lawmawm tak a nih avangin mipuite chu ngai pawimawha vaccine la zel turin a ngen a, Vaccine mamawh khawp chu Mizoramin a dawn thu leh tun dinhmunah chuan an hnianghnar rih thu a sawi bawk.
Dr. Lalzawmi chuan nu naupai vaccine lak chungchangah insawi ṭhaih an lo awm leh ṭhin thu leh a hlauhawm loh thu a sawi a, hei bakah hian Pathian thu zawnga la a insawiṭhaih chingte thlenga an awm thu a sawi a. Mi nuai 7 chuangin an lak tawh hnuah pawh thil duhawmlo thleng engmah a awm lo chuan a hlauhawm lo a ni tih a tihchian thu a sawi a ni.
Vaccine la tawh vei nawnte chu, vaccine a thawklo tihna a ni lo a ti a, a vei nawn an awm pawhin an taksaa a thawh dan a nêp tawh em em a, kum upa lamah pawh an nat dan a nasa lo niin a sawi.
Ningani thleng khan Mizoram pumah covid vaccine dose 7,79,390 pek chhuah tawh a ni a, heta 6,16,278 hi dose khatna niin, 1,63,112 hi dose hnihna a ni a, sawrkar hnuaia vaccine pek chhuah tawh zat hi dose 7,76,539 niin, private hospital-in vaccine an pek chhuah tawh zawng zawng hi dose 2,851 a ni.