Mipuite inrenchem taka khawsa rih turin ngen

Assam nena tunhnaia ramri buaina thleng avangin nitin mamawh chawkluhna kawngpui a ralmuang rih lova, chuvangin, Food Civil Supplies and Consumer Affairs Department chuan nimin khan thuchhuah siamin mipuite inrenchem taka khawsa rih turin a ngen.

Mizoram sawrkar chuan mipui nitin mamawh tuialhthei leh eirawng-bawlna gas chu ṭhenawm state dang aṭanga chawk luh tumin chak taka hmalak mek a ni a, amaherawhchu, hnianghnar taka state-in a chawkluh ṭhin zat ang tun dinhmunah a pha rih lo, a ti a. Buhfai chawkluhna ber rel kawng pawh Assam ramchhungah tihchhiat a nih bawk avangin hun rei vak lo chu buhfai thlen hun pawh a fân deuh rih dawn nia rin a ni a, chhung tinte theihtawpa inrenchem ṭheuh tur leh mamawh bak a chuang liam chheprelh lo turin Mizoram mipuite Department chuan a ngen a ni.

Covid-19 hripui avangin Mizoramin inkhuahkhirhna khauh tak a kalpui mek a. Sawrkar inkaih-hruaina zulzuiin FCS&CA Department chuan nitin mamawh te leh thil pawimawh bika Department dawr duh te tan ruahmanna siam a ni.

Leave a Reply

This site uses Akismet to reduce spam. Learn how your comment data is processed.