Ramria pawm chin venghim ngam turin thalai pawlten sawrkar an phût

Nimin khan Mizoram hmun hrang hranga Ṭhalai Pawlte chuan thuchhuah inṭawm siamin, Bengal Eastern Frontier Regulation (BERF) 1875 chu 2006-a Mizoram Legislative Assembly leh Mizoram Council of Minister-ten kan ramri atána an lo pawm tawh a ni ang taka an pawm chin chu hauh a vénghim ngam turin Mizoram sawrkar an phüt tlat tih an tarlang.

Mizorama Ṭhalai Pawl hrang hrangte chuan ni 18 July, 2021-a Vairengtea pawl pathum – Mizo Zirlai Pâwl (MZP), Mizo Students’ Union (MSU) leh Vairengte Ṭhalai Pâwl (VṬP)-te’n Joint Resolution an siam chu Mizorama Thalai Pawl hrang hrangte chuan a tawp thlengin an thlâwp tlat a, thawhpui an ngaihna apiangah thawhpui zel turin Ṭhalai Pawlte chu an inpeih reng tih an tarlang a, kan ṭhenawmte politics vir vêl avângin kan ram hi chhete pawh kan chân tur a ni lo, tih chu Thalai Pâwlte ngaihdan a ni tih an tarlang.

Ṭhalai Pawlte chuan ramri chungchâng ngaihtuahtu tur committee din a ni ta chu lawmawm an tih thu sawiin, ramri venghim tura hna ṭha taka an thawh theih pawh an beisei thu an tarlang bawk.

Nimina thuchhuah siamtute hi Serchhip Ṭhalai Pawl, Chalrang Ṭhalai Pawl, Hnahthial Ṭhalai Pawl, Champhai Ṭhalai Pawl, Mamit District Ṭhalai Pawl leh Lunglei Ṭhalai pawlte an ni a, an pawl aiawh ṭheuhten hming an ziak hnan a ni.

Leave a Reply

This site uses Akismet to reduce spam. Learn how your comment data is processed.