Human Resources Development Board Vice-Chairman in Mangaldoi a 3rd IR te tlawh

L.Thangmawia MLA, Vice-Chairman, Human Resources Development Board chuan nimin khan Mizo 3rd IR Battalion Headquarters, Mangaldoi, Assam a tlawh.

Home Minister Lalchamliana nen an inbiakna angin nimin khan official duty-a Guwahati-a châm mek L.Thangmawia, MLA chuan Mizo 3rd IR Battalion sipaite chu an awmna hmun Mangaldoi-ah a tlawh a. MLA hi 3rd IR battalion Commandant B.Laldikpuia, MPS-in lo dawngsawngin, sipaite dinhmun leh 3rd IR sipaite hnathawh dante a lo hrilh a, 3rd IR Battalion Mizo sipaiten rampawna hna an thawhna te a hmunah ngei MLA hian a hmuhpui a ni.

Mizo sipaite hian an duty piahlamah an awmna chhehvel mite tan voluntary service chi hrang hrang an kalpui thin a, 3rd IR Assam a an awm atang hian cheng vaibelchhe 1.5 chuang helai mite ṭanpuina atan anmahni sum sengin an luangchhuak tawh a ni.

3rd IR Battalion Commandant hian Mizo Sipaite leh an awmna khawtual mi ten inlaichinna an neih that thu leh District Administration lam te pawhin an ngaihsak thu MLA hi a lo hrilh a ni.

MLA hian Mangaldoi-a Mizo Sipaite midang tana an luangchhuak thin leh miharsate an lo tanpui thin chu lawmawm a tih thu sawiin, hmalam hunah pawh chhunzawm zel turin a chah nghal bawk a ni.

MLA hian Sipaiten Games and Sports tournament neihna atan ₹10,000/- a hlan a ni.

Leave a Reply

This site uses Akismet to reduce spam. Learn how your comment data is processed.