Australia nula Ashleigh Barty chu kum 44 chhunga Australian zinga Australian Open champion hmasa ber a ni ta a, Inrinni a hmeichhe singles final khelhah Danielle Collins a hneh a ni.

World number one Barty hian set khatnaah harsatna a tawk lo naa, set hnihnaah hian American player Collins hian a rawn nawr na hle a, 5-1-in hma a hruai hman a, Set hnihna a la ngei dawna ngaih tawh hnuah Barty a rawn ṭang leh tak tak a, 6-3 7-6 (7-2)-in a rawn chak leh ta zawk a, Rod Laver Arena-a entu tam ber Australian mipuite thawm a ṭha kher mai.

Kum 25 mi, Queensland lam chhuak Barty hi kumin Australian Open-ah hian set khat mah hloh lovin a champion thei nghe nghe a ni.

A champion hnuah Barty chuan, “Duhthusam ram ka thleng a ni. Aussie ka ni hi ka inchhuang a, kan ramah ngei, kan hnampuite hmaah ngei ka champion thei hi nuam ka ti,” tiin a sawi.

Barty hian tennis chawlhsanin, kum 2014 khan professional cricket-te a khêl leh phawt a, chumi hnuah tennis lamah rawn kal lehin, 2019 khan French Open-ah a rawn champion a, nikum khan Wimbledon-ah a rawn champion leh a, world number one a ni. Australian Open-ah hian 2020 khan semi-final a lut a, mahse, nikum quarterfinal-ah a tla leh thung a, kuminah chuan chiang takin a champion a, Grand Slam pathumah a champion ta, US Open-a champion a leh a la hmabak a ni.

Kum 44 liamta khan Chris O’Neil chu Australian Openah hian a champion tawh a, khami hnuah mipa emaw, hmeichia emaw, Australia mihring zinga Australian Open-a champion thei an awm tawh lo a, Barty hian hei hi a rawn thai reh ta a ni.