Skip to content
Home » Chanchinthar » Covid-19 vanga kumina nunna chân 42 zinga 35 Aizawl pawn lama chêng

Covid-19 vanga kumina nunna chân 42 zinga 35 Aizawl pawn lama chêng

Health Minister Dr. R.Lalthangliana chuan nimin chhun thleng khan Covid-19 hripui vanga Mizorama nunna chân zat chu mi 593 an ni tawh a, an zingah hian mipa 376 awmin hmeichhia 217 an awm tih a sawi a, nikum lamah Aizawl khawpuia chêngte chu nunna chân zinga a tam ber an ni a, hripuiin thingtlang lam a luhchilh hnu hian thingtlang lamah pawh nunna chân an pung nasa hle a ti a, hrileng kan pun leh tak hluai a, kumin kum thar tir aṭanga nimin, January ni 28, 2022 thleng khan nunna chân mi 42 an awm tawh a, heng zinga mi 35 hi Aizawl khawpui pawn lam mi an ni, a ti a, kum 60 chunglam nunna chânte zingah vaccine la lo an tam chu a pawi takzet tih sawiin, vaccine lak chungchangah tan lak a ngai tih a sawi bawk a ni.

Health Minister hian he thu hi nimina District tina Deputy Commissioner-te leh Chief Medical Officer (CMO)-te nen COVID-19 dinhmun sawihoa virtual meeting an neihnaah a sawi a, Health Minister Dr R. Lalthangliana chuan nikum kum tawp lam khan kan dinhmun a ziaawm chho viau hman a, tunhnaiah hri kai kan pung nasa leh ta hle hi a lungchhiatthlak a, puh tur zawn duh chuan a awm ṭeuh thei ang a, mahse chu lam chu kan ngaihtuah hman tawh lova, hri inkaichhawnna dan chah leh hri kaite enkawl dam thuai thuai hi kan ngaih pawimawh ber a ṭul a ni, a ti a. Aizawl khawpui leh district headquarters-te a hma kha chuan hri kai tamna a ni ṭhin a, tunah chuan thingtlang kilkhawr ber ber nia kan ngaihahte pawh a khaw nawtin hri kai kan pung ta phawk phawk mai, Lengpui Airport-ah pawh khualzin rawn lut mi 600 bawr vel kumin chhung ringawt hian hri kai hmuhchhuah an ni a, CCC leh DCHC kan neihsate a khat chakin CCC siam belh leh hial kan ngai leh tawh a ti a, mipuite zingah hri kai inenkawl dan hriatthiam awlsam zawka kan inzirtir uar a ṭul tih sawiin, Home Isolation hi symptom nei lem lote tan chuan a ṭha tawk hle a, uluk taka inchik reng erawh a pawimawh dawn a ni, a ti.

District tin aṭangin DC leh CMO-ten report an pe a, District tam zawkah COVID-19 No Tolerance Week hmangin executive duty leh Police bakah Task Force-te ngawrh taka an duty thu tarlan a ni a, district hrang hrang dinhmun leh an hmalaknate ngaihthlak a ni bawk.

COVID-19 Vaccination programme pawh district tinah tluang taka kalpui a nih thu tarlan a nih rualin chhuanlam hrang hrang neia vaccine la duh lo an la awm thu tarlan a ni a, hemi chungchanga hmalak dan turte sawiho a ni.

He hun hi Health & Family Welfare Board Vice-Chairman Dr ZR Thiamsanga pawhin a hmanpui a ni.

Leave a Reply

This site uses Akismet to reduce spam. Learn how your comment data is processed.