Skip to content
Home » Chanchinthar » Final-ah Nadal leh Medvedev inkhel dawn

Final-ah Nadal leh Medvedev inkhel dawn

Pathiannia Australian Open Men’s Singles final khelh turah Rafael Nadal leh Daiil Medvedev-te an inhmachhawn dawn.

Semi-final hmasa zawkah Nadal chuan Metteo Berrettini chu 6-3, 6-2, 3-6, 6-3 in a hneh a, kum 35 mi Nadal hian Grand Slam title la hnem ber record thar siam turin vawi khat chak chiah a mamawh ta a. Noval Djokovic leh Roger Federer-te nen Men’s Singles-ah Grand Slam title 20 ṭheuh an la tawh a, Nadal hian Australian Open hi a la a nih chuan Grand Slam title 21 a lakna a ni dawn a, record thar a siam thei dawn a ni.

Nadal hi a champion a nih chuan Djokovic record ding lai, double career Grand Slam (Grand Slam palia vawi hnih tal champion vek thei) a rawn nih rual dawn bawk a ni.

Nadal hian Australian Open final vawi ruk a thlenna a ni a, kum 2009 khan a lo champion tawh a, French Open final vawi 13 lut tawhin, US Open leh Wimbledon-ah te final vawi nga ve ve a lut tawh bawk a ni.

Semi final game hnuhnung zawkah second seed Medvedev hian 7-6 (7-5), 4-6, 6-4, 6-1-in seventh seed Stefanos Tsitsipas a hneh ve bawk a, US Open champion lai kum 25 mi Medvedev hi kumin Australian Open-a champion tura rinkai ber pakhat a ni a, nikum pawh khan Australian Open final thleng tawhin Novak Djokovic-a lakah a tlawm a, a zawnin Australian Open final-ah a inlan dawn.

Set hnih hmuhnawm tak an khelh hnuah Medvedev hi umpire lakah a thinrim hle a, a thinrim chhan hi Tsitsipas pa, Apostolos chuan Tsitsipas-a’n point a hmuh zawh apiangin thusawi a lo nei ziah chunga umpire-in code violation a pek loh vang a ni.

Tennis-ah hian coach an nei thiang a, nimahsela court chhunga an luh tawh chuan an coach te’n tawngkam emaw zaizir emaw, ngaihbel theih tur hrim hrim in emaw coaching an pe thiang lova, umpire Campistol hian set linaah Tsitsipas hi warning a pe a, hemi hnu hian Tsitsipas hian game la tawh lovin a tlawm zui ta bawk.

Final a hmuhnawm dawn a, Nadal a chak chuan kum 35 mi hian men’s singles-a Grand Slam title la hnem ber record thar a siam dawn a, Medvedev hi a chak a nih chuan world number 1 a ni thung dawn a ni.

Leave a Reply

This site uses Akismet to reduce spam. Learn how your comment data is processed.