National Highway in a tihchhiat tur Bualpui Thlanmual ram chhunga mimal House Pass pakhat leh Govt Land lo awmdan chhui chiang tura Bualpui branch YMA-in FIR an thehluh chu nimin khan Kawnpui PS-ah Kolasib Addl. SP David J Byhnadaolai hovin Bualpui VC leh YMA-ten an sawiho a, Addl SP chuan rorelna court lama thubuai thehlut turin YMA hnenah thurawn a pe.
Kawnpui chanchinbu Chhuahtlang editor H.Lalmuanpuia sawi danin sawihonaah hian YMA hruaitute chuan Thlanmual ram chu VC ten YMA hnenah pass mumal tak siamin an pe ngei a, a neitu nihna pawh YMA-ah hlan a nih thu tarlan a ni. Chutihlaiin YMA hriat loha House Pass pakhat lo awm leh sawrkar ram anga plot pahnih lo awm chu Bualpui VC-te pawhin a chhan an hriat bik loh thu an sawi.
Nikum 2021 khan YMA president chuan, “Kha tih hun lai khan Thlanmual ram Pass hi kan hmu mai lo a, chuvangin YMA hruaitu mi pathum te hminga Pass siam mai kan duh tlang a; chutiang chuan VC te kan siamtir a ni. Mahse a hnuah YMA lehkha dah ṭhatna aṭangin Thlanmual Pass kan hmu chhuak leh a, chutianga Pass kan hmuh leh tak si ah chuan mimal hminga Pass siam chu Branch Committee-in hnuhdawh leh nise tiin kan rel a, kan hnuhdawh thu VC-ah kan thlen a, kan rel ṭhat leh lai hian VC-te chuan document theh luh ngai te chu CALA (DC Office ah) an lo theh lut hman tawh a ni,” tiin a sawi.
Thudawn danin Bualpui Thlanmual ram chhunga House Pass hi kum 2012 a pek chhuah niin hriat a ni a, mahse YMA chuan tun hnaiah House Pass a awm tih a hre chhuak chauh a ni.
Kawnpui police-te chuan tun maiah chuan criminal case ziah luh tur an la nei rih lova, he thil lo irh chhuah dan hi an la zir chiang phawt dawn a, Bualpui YMA pawhin an FIR an la kir rih lo bawk.