Mizoram State AYUSH Society Governing body chu an chairman Dr R.Lalthangliana, Health Minister hovin nimin khan MINECO-ah an ṭhukhawm.
Dr R.Lalthangliana chuan AYUSH chu sawrkar laipuiin a ngaih pawimawh avangin Mizoram State chhungah hmasawnna hna pawh chak takin a kalpui theih a, tun dinhmunah District hrang hrang tan Hospital thar, khum 50 awm theihna tur leh khum 10 awm theihna tur dil mek a ni a, sawrkar laipui Ministry of AYUSH chuan a pawmpui tawh a ni, a ti a. Heng hospital dinna tur atana sum ruahmanah hian thawktu rawihna tur leh bungraw mamawh leina tur pawh dah tel a ni tih Minister chuan a sawi bawk.
Sawrkar laipui duhdan angin Mizoram chhunga Sub-Centre awm zawng zawng aṭanga chhuta za zela 10 chu AYUSH doctor-te enkawl turin Health & Wellness Centre-ah siam a ni dawn a, Sub-Centre 38-te chu Mizoram District 8 aṭanga thlan chhuah niin, National AYUSH Mission, Mizoram chuan a enkawl dawn a, an zinga centre 24 te chu ṭha taka kalpui an ni tawh a, a bak 14-te chuan hna an thawh ve thuai theihna turin nimina Governing Body ṭhukhawm chuan thawktu lak dan tur an sawiho a, Health Secretary chairman-na hnuaia din Selection Board-in thawktu thar an lak thuai theihnana dilna agenda lut chu Governing Body ṭhukhawm chuan a pawmpui a ni.
Sub-centre 14 thlanchhuah, Health & Wellness Centre-a hlankai tur te hi nikum January 17 khan sawrkar laipui Ministry of AYUSH chuan a pawmpui tawh a, thawktu lak a nih dawn bakah sub-centre cheiṭhat hna leh hmanraw mamawh leina tur sum dah tel a ni.
Kum 2020-2021 khan AYUSH Hospital khum 50 awmna tur DPR chu Champhai, Hnahthial leh Aizawl atan Ministry of AYUSH chuan a thuphungin a pawmsak tawh a, Saitual, Hortoki leh Khawzawl-ahte khum 10 awmna hospital pakhat ṭheuh sak dilna DPR thehluh pawh Ministry chuan a thuphungin a pawmsak tawh a, New Capital Complex-ah AYUSH Development Centre sak tum niin, dilna hi North Eastern Council-ah thehluh a ni a, hei pawh hi a thuphunga pawmpuina (approval) hmuh a nih tawh thu meeting-ah hian tarlan a ni.
Tun dinhmunah khum 50 awmna AYUSH Hospital pakhat Thenzawlah a awm mek a, khum 10 awmna hospital hi Lunglei, Champhai, Siaha, Lawngtlai, Mamit, Kolasib leh Serchhip District-ahte a awm a, AYUSH IPD building chu Hnahthial, Tlabung, Sakawrdai, Biate, Vairengte leh Lengpuiahte awmin, AYUSH OPD Building chu Thingsulthliah, Haulawng, Sairang, Marpara leh S.Vanlaiphaiah te a awm bawk.