Civil Hospital Aizawl chuan Mizoram Journalists’ Association Gen. Hqrs. member-te tan a thlâwna inentirna a buatsaih chu nimin aṭang khan neih ṭan a ni.
Inentir ṭan hmaa inkhawm tawi Doctor Seminar Room-a neih chu Civil Hospital Aizawl medical superintendent Dr Lalhmuchhuaka’n a kaihruai a, an theih anga Hospital lam an inbuatsaih dan te a sawi a, MJA president Zonunsanga Khiangte chuan kum 2009 vel aṭanga kum khat leh a chanve vel zel anga Civil Hospital Aizawl-in MJA member-te tana a thlawna inentirna a buatsaih ṭhin chu an lawm hle tih a sawi a ni.
A ni khatnaah hian MJA member 30 vel an inentir a, vawiinah chhunzawm leh a ni ang. Test leh investigation hrang hrang an tihsak hnuah Medicine Department-in investigation report aṭang hian an inenkawl zui dan tur an kawhhmuh leh dawn a, February 10 hian free health check up neih puala inkhawm hi Civil Hospital hmunah hian neih tum a ni a, Health minister Dr R Lalthangliana chuan a hmanpui ang.