Darkar 24 chhunga Mizorama hri kai zat 806 chu India hmarchhak state 8 zinga hri kai thar tam ber, Assam dawttu a ni a, hri kai endik zat aṭanga chhutin za zela 28.38 zet a ni.
Pathianni khan RT-PCR leh FIA hmanga endik a awm lova, Rapid Antigen Test leh TrueNAT hmang chauhva endik a ni a, hri kai leh kai lo endik zawng zawng hi mi 2,771 an ni a, en zât aṭanga hri kai hmuhchhuah hi za zela 28.73 a ni.
Hmarchhak state 8 zingah hri kai hmuhchhuah thar 901 awmna Assam chu a tam ber a, Mizoramin a dawt a ni.
Kum hlui December ni 1 leh ni 31 inkar khan hri kai 6,731 hmuhchhuah a ni a, tun thla ni 1 aṭanga nimin zing thlenga hri kai awm thar zat chu 30,907 an tling tawh a ni.
Nimin khan, tlai dar 5 thlenga hri kai enkawlna hmun aṭanga chhuahtir chu mi 1,740 an ni a, heti hian hri kai dam leh tawh hi mi 1,59,324 an ni a, hri kai mek mi 12,559 an la awm a. Hri kai tawh zawng zawng hi mi 1,72,491 an ni a, chuta tanga chhut chuan hri kai dam leh tawh zat hi za zela 92.37 a ni a, hri avanga nunna chan tawh zawng zawng hi 608 an tling tawh a ni.