Everton chuan an manager thar atan Frank Lampard an lalût a, Lampard hian kum 2 leh a chanve daih tur contract a ziak ni.
Chelsea manager hlui, kum 43 mi, Lampard hian Everton-ah hian Rafael Benitez a thlak dawn a, Benitez hian game 13-a game khat chiah a chakpui hnua tun thla tir khan Everton hian an bân a, Everton manager a nih hnu hian Lampard chuan transfer window inhawng hun tlem la awmah player thar lakluh tur lamah a buai nghal a ni.
Everton thuneitute chuan Zirtawpni khan an manager tura interview hnu-hnung ber neiin, hetah hian Lampard bakah Portuguese coach Vitor Pereira leh caretaker manager ni lai Duncan Ferguson-te pawh an tel a ni.
Nikum January thla khan Chelsea-in Lampard hi an bân a, khami hnu khan club enkawl a nei leh lo a, Everton-ah hian Swansea leh Derby County manager hlui Paul Clement chu a assistant a ni ang.
Tunah hian Everton hian khelh 20 aṭanga point 19 chiah hlawhchhuakin, 16-naah an awm mek a, tla thei dinhmunah an ding a, Everton a enkawl hnua a game hmasa berah Inrinni khian FA Cup Fourth round-ah Brentford an mikhual dawn a, karleh Thawhlehni khian tlak hlau Newcastle United tlawhin an zin chhuak nghal dawn bawk a ni.