Hri leng avanga Disaster Management state executive committee-in January ni 7-a mipui leh sawrkar kalphung tur inkhuahkhirhna a lo siam tawh chu thu leh awm hma atan pawhsei a ni.
Hemi chungchangah hian state executive committee chairman, Pi Renu Sharma, chief secretary chuan nimin khan thupek chhuahin inkaihhruaina hman mek chu thu leh awm hma atan a pawtsei a, nimin vek khan Serchhip District Bawrhsap, Nazuk Kumar, IAS pawhin Mizoram sawrkar-in inkaihhruaina a siam bawhzuina leh, Covid-
19 hrileng hluar zel leh a aia hlauhawm zawka sawi variant of concern ‘omicron’ darh zel tur venna atana January ni 7-a Serchhip District chhunga hman tur inkaihhruaina tihchhuah chu thu leh awm hma chu a ngai angin Serchhip District chhungah hman chhunzawm tur a nih thu thupek a tichhuak ve nghal bawk.
Hetih lai hian Pathiannia Health Minister Dr R. Lalthangliana leh Disaster Management Minister Lalchamliana hova ṭhukhawm chuan rawtna engemawzat siam chu an thlirho a, hetah hian Red Zone huamchhungah zing ṭawngṭai inkhawm tih loh chu kohhran inkhawm leh sakhaw lam thil ni lova inkhawm phal loh ni se tia rawtna siam a ni a, rawtna dangah chuan zinga ke-a kal leh thirsakawr hmanga insawizawi phal a ni a, mi 5 aia tam a huhova insawizawi erawh chu khap ni se an ti a, Gym pawh hawn phal loh ni se, Red zone pawn lama biak ina inkhawm chungchang chu tualchhung kohhran hruaitute kutah dah ni se tih leh Red zone chhungah dawr inhawn chhawk ni se tihte a ni.
Sawrkar pisa te chu department hotute’n inhnaih lova hna thawh theih dan tur an ruahman ang a, Executive duty leh Police te’n hri darh lohna tura inkaihhruai-na kenkawh hna an thawk ang. Community Covid Care Centre (4C) din thar leh chungchang pawh sawi chhuah a ni a, an mamawh dan a zirin khawtlang hruaitute’n ruahmanna an siam zel tih tarlan a ni bawk.