Lungleia tlawmngai pawl, kohhran, political party aiawh kalkhawm chuan Myanmar aṭanga raltlante chu India khua leh tui nghet an nih theihna tur lehkha pêk loh ni se an ti.
Kohhran aiawhte’n raltlan an lo dawnsawn dan sawiin, Presbyterian kohhran chuan raltlan zingah an fate nau hual leh baptisma an chantir theih loh bakah kohhran member nghetah sawrkarin a pawm loh chuan an lalut thei lo tih an sawi a. Baptist leh Catholic kohhrante pawhin member nghetah an pawm thei rihlo tih an sawi. UPC-te erawh chuan baptisma leh nau hual chu an thei tih an sawi a, tualchhung kohhran kutah an dah tih an sawi thung a, sawihona zau tak neih a nih hnuah India khua leh tui nghet an nih theihna tur atan Kohhran hian document nghet (Nau hualna leh Baptisma Certificate) pe chhuak lo tura ngen nise an ti ta a ni.
He inrawnkhawm hi nimin khan Lunglei YMA Sub-Hqrs. kaihhruaiin Lungleia Kohhran hrang hrang, political party aiawh leh MJA-ten Myanmar raltlan lo lut te lo dawnsawn dan chungchang leh tun thlenga Kohhranin a lo dawnsawn dan chin leh hmalak a tum dante sawihona hun buatsaih a ni a. Lunglei YMA Sub Hqrs President Lalrotluanga chuan an inkohkhawm chhan a sawifiah a, tun thlenga YMA-in a buaipui dan sawiin hun lo kal zel turah tih sual palh a awm thei em tih chungchangah inrawn-khawmna huaihawt a ni a ti.
Sub.Hqrs YMA Secretary Zothanzuala Hnamte chuan report pe-in Myanmar ratlan hi YMA Sub-Hqrs. Lunglei huam chhungah mi 1,042 awmin Lunglei Town branch (21)-ah ṭanpuina cheng nuai 1.8 leh Hnahthial District (Tuiphai Group)-ah cheng nuai 1.5 sem tawh a ni a, CYMA aṭangin puitling pakhat zel tan ₹700/- zelin mi 153 hnenah pek a ni a ti.
Lunglei district bawrhsap pisa aṭang pawhin mi 167 tan ṭanpuina mi pakhat ₹300/- zela ṭanpuina pek a ni a, hemi hnu hian mi 137 tan mi pakhat zel ₹300/- pek a ni leh bawk. Thaizawl khua a raltlan mi 594 te hnenah ei tur pek a niin Chawngte,Phairuangkai leh Vanhne a raltlan te pawh ₹300/- ṭheuh ṭanpuina pek a ni bawk tih a tarlang.