Mizoram sawrkarin Mizoram leh Manipur-a kawlphetha hman man (power tariff) bithliahtu, Joint Electricity Regulatory Commission for Mizoram and Manipur (JERC)-ah kum 2022-23 atan kawlphetha hman man ennawn a, tihsan a rawt chungchangah sawisêlna ziaka thehlut mimal leh pawl, panga an awm tawh.
January 28, 2022 khan Power & Electricity department chuan kawlphetha hman man tihsan an rawt thu leh sawiselna leh rawtna JERC-a thehlut duh tan February 20, 2022 thleng hun hawn a nih thu an lo tarlang tawh a, sawiselna leh rawtna thlentuten hmaichhanah an duh angte an sawina hun (public hearing) buatsaih leh tur a ni a, Power & Electricty department lamin an duh dante an sawi ve bawk dawn a ni.
Mizoram sawrkar chuan kawlphetha man 21.05%-a tihsan a rawt a, sawrkarin rawtna a siam anga power tariff tihsan a nih chuan sawrkarin a subsidise hnuah chawhrualin power unit khat man ₹8.80 a ni dawn a, tariff hman mekah chuan unit khat man ₹6.71 a ni
Sawrkar kum kal mek, 2021-22 power tariff atan Mizoram sawrkar chuan nikum 2021 khan 41.92% a tihsan a lo rawt tawh a, mahse, JERC chuan Mizoram sawrkar rawtna chu pawm loin, 20.68%-in a tisang.
Power & Electricity department chuan electric hman man, tariff thar tura rawt aṭanga sum hmuh belhin department-in revenue a hmuh tur zât a hmuh tlin loh ṭhinna a tihziaawm beisei a nih thu hriattirna an tihchhuahah an tarlang tawh a, electric hman hman tuna rawtna anga tihpun a nih chuan rate hman mek lai aiin cheng vbc. 75.83 hmuh belh tura chhut a ni.
JERC hotute sawi danin, Inrinni thlenga ziaka sawiselna an dawn zat chu panga niin, chungte chu mimal aṭangin pakhat, political party aṭangin ZPM, MPYCC, MPC leh NGO aṭangin Central YMA te an ni.