Naktuk, Thawhlehni aṭanga ṭan tura Mizoram assembly inkhawma putluh tur sawrkarin dan siam leh siamṭhat tura a duan pali leh mimal duan 1 a lut tawh.

Tun thlengin Assembly inkhawm laia House chhunga chhân tur chi zawhna (starred question) 566 a lut tawh a, sawrkar department lam chhânna 173 a lut tawh bawk. Ziaka chhân chi (unstarred question) 280 lûtah chhanna 73 a lut tawh a. MLA-te’n mimala an ngaih pawi-mawh, assembly pawmpui tura chhawpchhuah tura an duh (private member resolution) 65 a lut tawh a, Assembly House dawhkana dan tur sawrkar lehkha pawimawh 7 thehluh a ni tawh bawk.

Assembly inkhawm ni hmasa ber Thawhlehni hian Dr. Hari Babu Kambham-pati chuan thu a sawi ang a, a thusawi chunga lawmthu sawina chu a tuk Nilaini-ah sawi hovin pawm tum a ni ang. Ningani khian Finance changtu chief minister Zoramthanga chuan 2022-2023 tangka kum atana Mizoram sum ruahman (budget) leh sawrkar kum kallai a sum indaih lohna phuhruk na’na sum dil belhna chu House-ah a pharh ang. March ni 10 thleng a neih tura ruahman lawk chhin a ni.