Zothlifim Logo
Loading ...

Mizoram Larsap Dr. Hari Babu Kambhampati leh a nupui Dr. Jayashree Kambhampati-te chuan nimin khan Raj Bhawan-ah Asian University for Women, Chittagong, Bangladesh-a lut tur, Syngenta Scholarship Awardee Hmangaihzuali leh a chhungte thingpui an inpui a, Scholarship a hmuh avangin an lawmpui nan Larsap-te nupa hian thilpek an hlan a ni.

Hmangzuali’n Syngenta company aṭanga kum 5 chhunga Asian University for Women-ah a zirchhunga senso zawng zawng tur scholarship a hmu chu a chhuan thu Larsap chuan a sawi a, he scholarship a dil dan te, University-ah subject a zir tur te, a zir zawha a kal zel tum dante leh an chhungkaw dinhmunte zâwtin a zirna kawnga theihtawp chhuaha Mizoram tihmingṭha turin a fuih a ni.

Agriculture lam buaipuitu khawvel huap pawha company lian tak, Switzerland a hmunpui nei Syngenta Company hian Asian Women University-a lut tur zirlai 5-te chu an zirna senso man zawng zawng tum turin Scholarship a pe a, Hmangaihzuali pawh hi full scholarship dawng zingah thlan niin, zirlai dang 4 chu Bangladesh mi an ni a, Hmangaihzuali hi H. Lalbiakthanga fanu niin Thingsul Tlangnuam khua an ni.


Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117