ZPM Leader Lalduhoma, MLA chuan Cabinet Sub-Committee-in grape aṭanga wine siam titawp tura a rawt chu Grape chingtute tan chuan “Chem lova lulak” a tling a, hlim taka nuihtir thintu an huante chu tah tichhuaktu an lo chang zo ta a ni.

Lalduhoma hian nimin khan press statement siamin Food Safety and Standards Authority of India chuan Wine hi Food item-ah a dah a, Winery pawh hi Food Processing Unit-ah a ngai a ni, a ti a, Liquor (Zu) leh Wine hi thil hrang a ni a, tehna thuhmuna teh chi a ni lo, a ti a, state hrang hrangah Winery hi Dan hnuaiah mumal taka kalpui a ni tih sawiin, ṭhenawm State – Nagaland-ah chuan Dragon Fruit aṭangin Orgnanic Wine an siam a, bur khat ₹1,100/- man lai a ni tiin, Arunachal Pradesh-ah chuan Kiwi aṭangin Wine an siam a, Excise Duty leh Sales Tax kum 10 chhung an âwl nghe nghe, a ti a, Meghalaya-ah chuan Homemade Wine an uar a, Licence pawh Deputy Commissioner ten an pe mai a ni a ti.

Lalduhoma chuan Mizoramah Grape hi kum 2005 aṭang khan eizawnna thama chin ṭan a ni tiin tunah hian Hnahlan leh Champhai velah chhungkua 750 velin an ching mek a ni, a ti a, sawrkar pawhin a tuipui avangin, heng society pahnihte hnenah hian bul ṭan nan MIP hnuaiah cheng nuai 166 lai a pe a, a ṭanpui reng ṭhin tih a sawi a, Wine chi hrang hrang siamin a quality pawh a sang chho ve zel a, kum 2016 aṭang khan Sacramental Wine an siam chu bur 1 ₹100-in Mizoram Baptis Kohhran chuan a leisak tih a sawi bawk.

Champhai Grape Growers Society hmalakna sawiin, “Kum 2010-11 leh 2020-21 inkar kum 11 chhung hian ₹17,06,04,323 man an thar a, kum 2012-13 leh 2015-16 inkar kum 4 chhung lek hian Superintendent of Excise and Narcotics, Champhai hnenah excise duty ₹13,62,539 an chhunglut hman a, hei bakah hian vendor-ten excise duty an pe bawk,” tiin, Hnahlan lam figure erawh a nei thei rih lo tih a sawi a, Mizoram pawn lamah te pawh a Market an dap hmu mek zel a, Japan International Cooperative Agency leh IIM Kolkatta Innovation Park huaihawt Focus – The NE Accelarator-ah North East aṭanga project 600 chuang thehluh aṭanga project 12 thlan zingah Mizoram Winery Project chu a tel pha nghe nghe tih sawiin, hengte hian Grape chingtute chu thathona nasa tak a pe tih a sawiin, phur taka hmalam an pan mek laiin Cabinet Sub -Committee chuan thutlukna lungchhiat thlak tak mai a siam ta thut mai tih sawiin, Sub-Committee thutlukna chu Cabinet-in ennawn leh se an duh tih a sawi a, Sub-Committee thu hi an kaltlangpui dawn a nih pawhin zangnadawmna te pein, eizawnna danga an pakai leh theihna khawp ruahmanna siam sak ngei se tih an phut tih a sawi a ni.

Lalduhoma chuan Grape chin hian thatchhhiatna leh dawngdahna a um bo tih sawiin ṭhalaite rilruah rual elna leh taihmakna a pe a, an In leh lovah hmuh theihin hmasawnna a thlen a, Sorkar Policy – “Thingtlang Lo neih bansan” tihlawhtlingtu a ni tih sawiin ZPM chu kuhhnathawktute ṭhian a nih angin, Grape chingtute chu thinlung takin an tawrhpui tih a sawi a ni.