Mizoram hi sawrkar hriatpuia smuggling ti awmchhun a nih ka ring:Lalduhoma

ZPM Leader Lalduhoma, MLA chuan Mizoram chu India rama state zingah state sawrkar hriatpuia smuggling ti awm-chhun a nih a rin thu a sawi.

He thu hi nimina ZPM elected OB leh Leader-ten Aizawl Press Club-a thuthar lakhawmtute an kawmnaah a sawi a, Lalduhoma chuan kuhva tawlhruk chungchang sawiin, Congress sawrkar hnuaiah pawh kum 2 chhung kalpui a lo ni tawh a ti a, MNF sawrkar lai pawhin kuhva tawlhruk hi chhunzawm zel niin Home Ministry chuan Manipur leh Mizoram Chief Secretary te kuhva tawlhruk titawp turin kum 2019 khan a hriattir tawh a, hetah hian India leh Myanmar sumdawngte inkarah Mizoram sumdawngte chu a luankawrah an ṭan thu te, MAMCO-in Mizorama thar chhuah ang a lantirin transit pass a pek thu te tarlan a ni a, Mizoram sawrkar chuan chhui chian emaw, action lak emaw a tum miah lo a ti a, sawrkar mitmei ven tur a awm miau loh avangin kuhva tawlhruk chu ualau taka kalpui a ni ta zel a ni a ti.

Lalduhoma chuan kuhva sumdawnnaah hian pawl lian zual 3 an awm tih a sawi a, heta tel ve tur hi chuan cheng nuai 35 thawh a ngai a. Assam Rifles leh Custom ho an tawn tlang theih nan chung pawl 3-te leh Home Minister chuan fing takin ruahmanna an siam ta niin a sawi a, dan hrulah, mitsiai chungin E-Way Bill hmangin sawrkar chuan GST a la ta niin a sawi bawk.

Lalduhoma chuan sumdawng pawl paliin kalkawngah harsatna an tawh loh nan an aiawha hma latu tur Ruling Party mi thiltithei tak chu ziak meuhin an ruat tih a sawi a, hmun tamtakah kudam lo pungin sawrkar kudam thlengin kuhva leh leichi dah nan ualau taka hman a ni, a ti a, Kuhva bag-ah hian special bag te, VIP quota te a awm leh zel a, Lengpui airport aṭanga thlawhna hmanga thawnchhuah a ni hial tawh niin a sawi bawk.

Kuhva tawlhrûka a mawhphurtu bulpui ber chu sawrkar a nih thu Lalduhoma chuan a sawi a, ZPM an sawrkar chuan kuhva a ni emaw, thildang a ni emaw, dan ang taka an kalpui tur thu a sawi a, an party mi leh sa zingah he thila inhnamhnawih an awm a nih chuan tun aṭang chuan lo inthiarfihlim turin an beisei tih a sawi bawk.